أكبـر قهـر لاجيـت كلكـ من أقصـاكـ

المشكله لاجيت كلك من اقصاك
عشان شخص ٍ للأسف مادرا فيك

يصيبك الاحباط وتضيق دنياك
وتضيع لحظات الامل بين اياديك

شخص ٍ تحسبنه يبيك او تمناك
في عز لحظات الغلا مايحاكيك

تحتاجله في عز ضيقك ولاجاك
وهو بوقت الضيق دايم يلاقيك

تتعب معه ثم تكشف به تغاضاك
والمشكله ماقال ياشيخ مابيك

لو قالها يمكن تغير نواياك
او تختصر درب ٍ لشخصه يوديك

يغيب يرجع حالف ٍ ماتناساك
يقول بس الظروف لازم نخليك

تزعل ويرجعلك تحسبه تراضاك
وأثريه مثل ابليس وده يأذيك

ماهمه اللي صار بالود يبلاك
يبيك في دنياك تكثر بلاويك

مثل العذول اللي يضايقه ممشاك
يفرح ليامن شاف وقتك معنيك

يغيضه اسمك مع قصيدك ومبداك
وأثره مثل بعض البشر ماتدانيك

تغيير منك وأتمنى مزاياك
وهي تموت من القهر ماتساويك

بعض البشر يضحك بوجهك ويشناك
وبعض البشر لاغبت بالخير يطريك

أحذر من اللي لاسلى عنك خلاك
تراه لا مـن غبت صعبه يحاتيك

واحرص علي اللي يسعده دوم لقياك
اللي ليامن شـاف شخصـك يحييك

هذاك وقت الضيق تلقاه يمناك
جازه بفعل الطيب دامه يجازيك

واللي على فعل النذاله تعاداك
اضحك بوجهه واحقره يبتلش فيك

بعض البشر يسمح ويدمح خطاياك
وبعض البشر صعبه يطوف ويبليك

من عادت الايام تنسى عطاياك
قليل بين الناس يذكر حسانيك

والحظ لامنه لفاك او تعداك
يضيق حالك وتعوكس لياليك

تحسب حسابك غير وتضيق وياك
ويصير هالهاجوس دايم يباريك

والوقت اكبر مشكله لاتحداك
يضيع منك تحسبنه يسليك

واكبر قهر لاجيت كلك من اقصاك
عشان شخص ٍ للأسف مادرا فيك







تحياتي .. الراحل