مــن روائــ ع ][ أحمد الصانـــ ع ][

][ أنا شفت الزمن ناوي علينا وقلت له : خذني ...! ][

شِرَق هذا الفراق اللي كِسَرني حزَّة غروبك
________ بغيتك وإستحَت عيني من الغلطات صدقني !

كتبتك من قبل لا تجرح الكلمات مكتوبك ..
________ إذا عندك عذر باقي على التقصير إعذرني !!

كثير الهَم متعوِّد علي .. وإنت يا دوبك
________ وكافي الحزن لو عنَّه أغيب أيَّام " يفقدني " !

حبيبي ليه متضايق وعلي متغيِّر إسلوبك ..؟
________ يبيِّن لو سِكت قلبك .., بأنْهَا ضيقتك مني

غيابي كان مو بيدي خذاني الحظ من صوبك !
________ وقلبي هذا هو حظه غريبٍ , من صغر سني ..

أبيك وما أبي غيرك .. وتأكد قلب محبوبك
________ جبره الوقت يتناسى لأجل بالخير تذكرني

إذا ردَّت علي أبقى معاك وثوبي من ثوبك
________ ولكن [ الزمن ] .. لمَّا أقرِّب يبعدك عني !

غصب رايح ولا برجع لأني أبرز عيوبك
________ حرام إنَّه يجي واحد يلومك من كثر " حزني " !

ترى ما رحت من كيفي عشان أتحمَّل ذنوبك
________ أنا شفت الزمن ناوي علينا وقلت له : خذني ...!

واذا قالوا : رَحَل عنِّك حبيبك ، فتِّش جيوبك
________ تطمَّن قلبي بـ جيبك حبيبي لا تدوِّرني !

لذلك قلت في نفسي أبي أبعد عن دروبك ..
________ تأكد غيبتي هذي عشانك إنت ... صدّقني !

:

][ قلتي .." أحبك " ][

قلتي ..
" أحبك "
من بعيد و ....... ضعت
شوفي عاد , لو من قريب ؟
ما تغيب أحلام قلبي في وجودك
لك أسلِّم نفسي , أربطني بقيودك
جابك الله ..؟
مدري لي جابك نصيب
المُهم أسمع " أحبك "

:

من لسانك
- غير [ صح الله لسانك ]
هو مكانك
ليه يبكي !
إن مشيتي من مكانك ؟
إحتملت وقلت ما أسمَع :
قلتي من ثاني أحبك ..!
رحت ساعاتها من الدنيا
إلى ساحل عيونك وما رجعت
الوطن حضنك .. وأنا من غير أحضانك " غريب " !
يعني من صجِّك ؟ سكوت ..!
ما أبي أكثر ألجِّك
قولي بسمعها , " أحبك "
وبعدَهَا يمكن ... أموت

:
قلتي ساهي
قلتي لاهي
وآنا ساكت ..!
عاجز أستوعب كلامك
وماهو تقليل إحترامك
بس عيونك
من عيونك
ما قدر أي شي ياخذني مِنْهَا
( الملاهي ) رمش عينك
والطفل ..
كان [ إنتباهي ]
ايه داخل في عيونك ما طلعت
الله لا يبعدني عَنْهَا
جعت شوقِك ,
لكن بشوفك .. شبعت
منجرح صبعي وإذا ودِّك يطيب
بطلبك بس شي واحد ما ( طمعت )
قولي " أحبك "
بصوت عاااالي
ما سمعت ..!

][ لا تستغرب إني أسألك ][

قبل أبتدي عندي طلب ركِّز طلب ماهو " رجاء " !
ما أبي تجاوبني .. ولا تستغرب إني أسألك
لا تنصدم من عزلتي حالي مثل : أبو العلاء
عندي سبب : ما تستحق إنِّي أجيك و أوصلك
لا تعتبر جمر الحكي من شاعرك يعني " هجاء "
لو كنت بهجي حضرتك ما خفت منِّك .. قلت لك !
هذي القصيده مصنِّفه في دفتري قصة " رثاء "
حبٍ يموت وتنولد .. وحبٍ يعيش ويقتلك !
ناديت لك ياما .. ولا لبِّيت لي , وضاع النداء !
مبحوح صوتي والصدى من كثر ما ناديت لك !
أقرب من ثيابي علي وأبعد من نجوم السماء
ورغم إبتعادك والتعب ..أرسم طموح وأمهلك ..
ما كنت لي الداء وأنا ما كنت لـ جروحك " دواء " ..
ما عشت في دنياي لي !!عايش ولكن عشت " لك " !
علمتك القلب الوفي .., ما يخذلك فيه " إنتماء " !
وعلمتني كيف العشم في من تحبه .. يخذلك !!
علمتك إن أصل الهوى يرجع لـ كلمة " إحتواء " !
وعلمتني إن الهوى , ما عاش يوم بـ داخلك !
علمتك إنِّي لك بحر [ مدَّه وجزره ] لك وفاء !
وعلمتني كيف أنصدم وأغرق أنا في ..ساحلك !
ما تستحي ,, ودامك كذا ؟ - إفعل حبيبي ما تشاء !
توِّي عرفت إنِّي كثر ما أعْرِفِك .. كنت أجهلك !
ما كان قلبي بس لك وقلبك لعب دور الدهاء !
وما كنت لك أقرب من أنفاسك وأقرب من هلك ؟!
ما عاد تفرق غيبتك أو رجعتك .. عندي سواء !
كنت إهتمامي ورغبتي .., والحين دوري أهملك !
لا صار قلبي لك وطن .. أبسألك وين الولاء ..؟
وشلون حال المملكه ؟ - دام الخيانه من ( ملك ) !
إن كنت جاهل ..! " لعبتك قلبي " وما فيها ذكاء
حتى الطفل إن جبت له [ لعبه ].. - ولاءه صار لك !
قبل أنتهي عندي - أمر ما هو طلب وإلا - رجاء ..
لا يشغلك ماضي إنتهى .. ركِّز علـى " مستقبلك " !

..!

][ قلت قلبه : بلادي][

قالوا ( بلادك ) قلت قلبه : بلادي
يعني أحبه ومن دواعي سروري

قالوا الركاده قلت مجنون : غادي
عقلي يحبه , ورايكم مو ضروري

قالو تبيه ..؟ وقلت حتَّى : فؤادي
طاريه دهن العود .. وطيفه بخوري

آنا بـ وادي وهـ الخلايق بـ وادي
أغيب عن هـ الناس أخفي حضوري

جيتك .. رغم طبعي وكل المبادي
عنِّك نهيت القلب ما طاع شوري !!

فينـي سجنتك .. والسجن إنفرادي
وغيرك عجز ويَّاي يرضي غروري

يا مزعج أفكاري ترى البال هادي
طوَّلت لك بالي .. ورتَّبت أموري

إنتَ الوحيد اللي , خضع له عنادي
من كثر ما أحبك وفت لك سطوري

وينك ..؟ تعال الحين .. ملِّيت أنادي
إن ما سمعت الصوت إسمَع شعوري

كل الأصايد في عيونك .. [ تمادي ]
إهداء منِّي بـ صوت : مروان خوري

أسأل متى بتروح وأقول : عادي
وإنتَ وجودك في حياتي ضروري !

][ يا سيِّدة شعري ][

يا ( سيِّدة شعري ) أنا .. قومي إرقصي بين السطور
في داخلي شوق / وعذر .. والله يعين المبتلي ..!

زعلانه مني ! وتنهدم فيني ملايين القصور
لأنك طموحي .. ورغبتي .. وتخطيطي لـ مستقبلي !

" بركان " شعري .. ما هدى وخايف مع المُده يثور !
في غيبتك .. شفتي الشعر وشلون فيني ينغلي ؟

زعلانه أدري .. وضيقتك في داخلك أربع شهور !
وتأكدي إنَّ إزْعَلِك .. هو يُعتَبَر نفس إزعَلي

يا زهرةٍ وسط العمر مو مثلَهَا باقي الزهور
يطاوعك قلبك كذا ؟ - عن زارعك ما تسألي !

ما كني إلا لك سما .. وفي هـ الفضا إنتي طيور !
يعني وجودك زينتي .. ولزوم فيني [ تمتلي ] ..!

من يوم ما غبتي وأنا : ضايع بلا قلب وشعور !
تايه ولا عندي أمل .. في آخري وفي أولي

يا أطهر اللي قابَلَت عيني على مر العصور
تعالي عندي وإسكني فيني .. كفى لا ترحلي !

يرضيك أقابل هـ البحر وأرمي من الضيقه صخور ؟
وأذكر سوالفنا بـ وَلَه .. وش قلتلك / وش قلتِلي !

في غيبتك حالي تَعَب ..وصرت ما أحب الظهور
ما غير أتمتم في نِدَم : يا وَيْلَ لي يا وَيْلَ لي !

إيه أعترف خنتك , ولكني رغم هذا غيور
أرفض تخونيني .. وأدري فيك ما ترضي علي !

شاعر .. وأكتب ما أبي وأقولها في كل غرور
إنك تحبيني غصب وسِمْعي الكلام اللي يلي :

كان القصايد مطلبك ؟ وهي اللي بتحل الأمور
بكتب قصيده أحلى من .. " صَوتُ صفير البُلبُلي "

][ جديدهـ [ لعبتك ] هذي ..][

جديدهـ [ لعبتك ] هذي ..
رجُوعك , ليه أبي أفهم ؟!
ترى ما جيت فـي وقتِك / أنا مُو حاسِب حسابك

نسيتك أو تناسيتك .. ( دخيل اللـه ) لا تهتم
وأبشرك .. وجه أحزاني ضحك لي , وإنقفل بابك

وبسيطه جات مِن صالح حياتي .. طعنتك , للعلم
قريتـك وإستفد قلبي مِـن المضمون .. بكتابك

تَعَلَّم قلبي مِنْ إيدك علـى كِـل ما مضى [ يندم ]
زرعتِك شُوق .. أتحرى حضورك , وأثمر غيابك

تِحَمَّلتِك / ولكنـه .. جُبرنـي الجـرح : أتكلم
خيانـه شِفتهـا مِنِّك .. عِطِـرهَا , تارس ثيابك

[ بنيتِك ] حُب في قلبي وإنتَ .. حضرتِك .. تهدم
كرهتِك حيـل صدقنـي .. وكِل هـذا مِن أسبابك

تقول : آسف ..؟! يا خلف الله !!
بقى بـ ( وجه ) التسامح / دم ...؟
أسامح كِل شي إلا الخيانــه , ونشوة إعجابك

أنا .. يا لِكْ أجـي واحد يساوي في عيونك كم
وإلا ما أجـي عنـدك وأغيِّـر , ناتِج أحبابك

تجيني .. والندم واضح ولا أقدر أقولك : سم
لأن الجرح من شافك تضايق قال : وش جابك

وإذا تحسبني برجـع لِك .. بلاش تفكِّر وتحلم
لأنـي مُـو مثـل أوَّل أحقق , رغبـة أهدابك

قديمه لعبتك هذي .. وكفايـه .. ما أبي أفهم
[ رجاءاً ] ..
إبتعِد عنَّي أنا مُـو ناقص ألعابك

][ •••• سـفينــة نـــوح •••• ][

يكلمني عن جروحه .. وأنا من سبِّته / مجروح !
يسولف لي عن (أحبابه) وأسولف (عنَّه) لـ حاله ....
أحس في دمعة عيونه , وتطلع من بكاه الروح ,
وإذا يفرح مع غيري . . . بكى " قلبي " و / هنَّاله .
ياليت آنا معاه اللي ركبنا في [ سفينة نوح ]
محد يقدر يفرقنا لا : عمِّي .. و لا : خاله
رسمته في قلم ناشف على قطعة خشب من لوح
و تهيألي يحاكيني !! ويبيني أرسم إظلالـه
تحرَّك طيفه الدايم . ولَعَب في حسبتي بجْموح .
يحب الخيل , و , أشعاري .. عشانه صاروا خيَّالـه
وصار بـ عيني ( الأجمل ) مع إنَّ شوي هو / مملوح ,
ولا غيره مــلا عيني وقلبي بس يصفالــه
ذبحني قلبي الساكت ! ... متى قلبي عليه يبوح ؟؟
أحبه وماعرف إني أحبـه , وأعشق وصاله . . .
كتمت , وهذا من طبعي , وتمنيت " الغلا " مفضوح
ببيِّن له ولا أقدر !! مع إنِّي جالس قباله .
أخاف إنّه بعد مُدَّه يطير ... ومن إيديني يروح !
هو نعمة من فضل ربي , ويقولوا : النعمـة زوَّالـه
لي قلبٍ من كثر حُبه على : فراش التعب : مطروح ,
لا هو " ميت "..ولا " عايش " .! ووالله إن مـااات أشواله .
وحبي من طرف واحد , غلا صادق بدون مزوح
وإذا هو طاح ؟ قداامـي .. نزلَّـه / قلبي / و : شــاله .!!
شكالي وكنت له أسمع . . . وقلبي دوم له / مفتوح
يطمِّني عن " أخباره " , وشنهي آخر أعمالـه
وإذا شفته خطا بـ حقي بدون أعذار ؟ .. هو مسموح ,
في نياته ولا يدري .! وطيبة قلبه همَّالـه .
في جياته ...... . يروح الهم , ويبدِّل ( دمعتي ) بـ فروح
تمنيت البشر مثله . . . وكل من حولي أمثاله .!
من الله حُبه في قلبي حشى مالي ترى مصلوح ,
عسى يكبــر ويذكرني ويسمِّي بـ " إسمي " : إعيالـه .

][ خُـــــدافِس شظـــايا ..!! ][

قبل الجراحه :

العين ما عادت تشوف المُنافِس
ما هو غرور وربِّي .. هذا " عمايا " !
الوقت في جُود النظر حيل / خافِس
أعمى وطاحت من إيديني عصايا !
وتخيَّل الموضوع : " ساحه وخنافِس "
وإنتَ عيونك .. ما تشوف الحيايا !
مثل " الطفل " في بطن أمه يرافِس
ما يدري عن دنياه وشكل " الزوايا "
برحل أنا ما دامه الوقت عافِس
ترتيب " عيني " صار همِّي وشقايا
مع السلامهـ
وبـ الإيراني خُدافِس
يعِز علي توديعكم يا " شظايـا " !!

بعد الجراحه :

[ سِته على سِته عيني والنظر يفرق
وبعد الجراحه أحس شويَّه في حرقا
ما كنت أدري الشظايـا لونَهَا أزرق
إلين سوِّيت عيني .. وشِفتَهَا زرقا ]

الحَمد لله ..
أبَشْرِك ..
طابت عيوني !
ولو تِرجَعْ الدنيا فِيني .. والله مَ اختارك
تِسْألنِي عَنْ حَالِتِي وفـ البُعد وشلوني ..!
آنا سَعِيد بـ غيابِك ..!
وإنت شخبارك ..؟
شخبار جرحي معاك وآخر طعوني ..?
عطني جديدك .. وعلِّمني عن " أفكارك "
مجنون خِلقهـ وإنت .. تزوِّد جنوني !
محروق قلبي وإنت .. تزيد في نارك !!
مِنْ رحت عنِّي ولهيت بـ دنيتك / دوني
ما عاد قلبي ( مُكانِك ) لا ولا دارك
علي تسأل غريبه ..!! ومنِّك " شجوني "
إنتَ " الوفا " مقاطِعِك .. ما أعتقد زارك
يا كِثْر اللِّي نسوني .. واللِّي يطروني
وإن كان حبِّيت غيري ..؟
جِعْلَهْ مبارك !
إنت وحبيبك .. وربعك / ما تهموني
وفِّر كلامك ..
وأحاسيسك ..
وأعذارك
ما عدت أفكِّر بِوَصْلِك وأتْعِب ظنوني ..
هذاك أوَّل .. يِهمْنِي / أسْمَع أخبارك
وإن كان ظنِّك تِمِس بـ غيبتك " كوني " ؟
أعيش في الظلمه " شامخ " مابي أنوارك
ولو رجلي تعجز تشيل الهَم ومتوني
أموت ظامي ..
ولا أترجى أمطارك !
راجع لي تسأل بـ كيف الحال وشلوني ..؟
تحسبها فرصه تقدِّم عذرك .. أزهارك
الحمد لله ..
بخير ونامت عيوني ..
وشلونك إنتَ وبعد فرقاي
...... شخبارك !؟

][ عــالم الجمـرهــ ــ ـ ][

شلتكْ منْ وسط نارْ الهمـوم وعالـم الجمـرهـ
وسقيتك من غلاي ومـا نفَـعْ طيبـي وتقديـري
مثل زهره قطفْها الوقت وقلبـي شالَهـا حسـره
لأني شفْتَهـا تَحْتـي وأخـافْ يدوسهـا غيـري
رسمتك لينْ ما شفتك مثل صـوره بـلا فكـرهـ
ألوّنهـا ولا يبيّـنْ بعيـنْ الصفحـه تصـويـري
أكلّمْ صفحتك / عيّـتْ تـدور ونهتنـي بكـرهـ
وعـاف القلـب هالصفحـه وأيّدْنـي بتدويـري
وغلاتك / مو أنا اللـي تهـزّه غلطـة البـذرهـ
صعـب اتأثـر بغيـري وغيـري فيـه تأثيـري
وإذا راحوا جميع الناس عنّي وهانـتْ العشـرهـ
أضل الشامخ بدمعي وأقـول لضحكتـي صيـري
أنـا مثـل الـذي يمشـي بغابـه كلّهـا خطـره
أكمّل خطوة دروبـي ولا توقَـفْ خُطـا سيـري
أنا ما همني حكي الجهال / أعـوذْ مـنْ شـرهـ
ولي غيـره علـى دينـي ولا أسْمَـحْ بتكفيـري
أجي للحاقد مواجه ويجينـي مـن ورى وكـرهـ
يقول: وما صدقْ قولـه وهمّـه بـس تصغيـري
كثر ما كنت أنا أسولف عليـك وبحـة النبـرهـ
كثـر مـا رحـت ناكرنـي ولا تفكّـر بتفكيـري
أنا شمسك / وإذا إنـتَ لقيـت بغيبتـي قمـرهـ
مردّكْ لي وإنْ طالـت بـكْ الدنيـا مـع غيـري
تبشّرنـي بأفراحـك ولا لـك بالـحـزن ذرهـ
عساهـا دوم ضحكاتـك وتحراهـا تباشـيـري
بلا منّه عطيت وما أبي مـن هالعطـا نظـرهـ
أنا طبعي كـذى دايـم / كافـي شـرّي وخيـري
وخلْها قصةٍ عنـدك وإخذهـا لدنيتـك عبـرهـ
أزيدك خيـر بأفعالـي وينقـص كـفْ تقصيـري
شفتك طايح ودامي وجبرتـه ساقـك وكسـرهـ
نطرته ليـنْ مـا ورّدْ وسقيتـه مـن تعابيـري
مدامك طبتْ منْ جرحك وصارتْ صحرتك خضرهـ
أمانه لا تردّه يـوم / إذا جـا وردتـك / طيـري

][ طفـــرة الأربــاح .. ( ما مــرتاح ) ..! ][

دخول :
ما مرتاح من ربعي ..
ولامرتاح !
نادوني ..
وركضت بـ ليل
إيد " الرسن " بيها ..
وإيدٍ بها " سلاح " ..
عثرَتْ مُهرتي ..!
و ..
" ربعي " قبل ماطيح
واحد قال للثاني :
" أبشرك " طاح
أبشرك " طاااح " ..!!!
لـ كاظم إسماعيل الكاطع

وأنا مثلك مع ربعي يا [ كاظم ].. حيل مو مرتاح ..!
كأنهم بيد عطشانه .. وكأني بينهم [ واحه ] !

خذا بعض الأسى بعضي وبعضي وين منِّي راح ؟!!
وقلبي قاتله حزنه ( سَ قَ ط ) .....
مقتوله أفراحه !!

أجيهم .. نيِّتي بيضا ويجُوني في شكل أشباح !
لأجل راحتهم أتعذَّب ..
عذابي عندهم راحه !!

تصدِّق ..؟!
حيل متضايق ( خساراتي ) لهم " أرباح " ..!
ضحكت
وكانت الضحكه من الصدمات و [ السَّاحه ] ..!!

إذا ربعك مثل : ( غابه ) .....؟!
أنا ربعي مثل : [ مسباح ] ..
وأنا شخصٍ .. عجز يجْمَع ( نَثِر ) حبَّات مسباحه !

وإذا صارعت من أجل القرايب / قوَّة التمساح .....؟!
أنا حتَّى البعيد اللِّي يجيني / مااات تمساحه !!

زرعت الطيب في قلب " الحجر " وإستغرَب الفَّلاح ..
قفل حظي مع ( الفرحه ) .. ألاقي ويييين مفتاحه ؟!

تعب : لا كنت في ظلم السجون وضايع المفتاح !
معاك الحق لكن [ العدل ] .. ما فاد مصباحه !

عتب : لا صار يتبشَّر صديقك .. والألم صدَّاح
وعدوِّك كان في لحظة سقُوطك , تنزف جراحه !!

بحر ..
يا موج ..
يا شط الصداقه .. كنت لك ملاَّح
سفينه كان لك قلبي .. ولكن غدرك إجتاحه !

حرام : إن كان لي واحد وأناديه بـ إسم يا صاااح
مدامه " صاحبي " بإيده سقاني .. السِم بـ قْداحه !

سمعت إصياح من عين المراجل ...؟!
إي / سمعت / إصياح ..
و [ طير المرجله ] في هالزمن متهلهل جناحه !!

( صديقي ) صار معناها بـ عيني .. واحدٍ " سفَّاح " ..
لأنهم أغلب أصحابي .. على الطعنات ذبَّاحه ..!

وفا شنهو الوفا ....؟!
[ شَمعٍ ] كثر ما يشعلونه ساح !!
ورمحٍ يصنعه وقتي ( وربعي ) حيل رمَّاحه !!

يجي واحد مُنى قلبه .. يشتت فيني [ الأفراح ] !!
وواحد ضاق لو يلمح عيوني .. تنام " مرتاحه " !!
و
واحد قال للثاني : من المُهرهـ أبَشْرِك طاااااح
كأن بـ طيحتي يلقى السعاده .....
و طفرة أرباحه !!

][ كنـت أظنـك ... ( و طحـت ) !! ][

جيتني " نادم " من الدنيا تصيح
ما تنام الليل .. وأدري ..
ما ..
ربحت !

شوف وش سوى عنادك ؟
- يا جريح
لا [ مريِّحني ] ..
ولا حتى إسترحت !

من فتحت الباب ..
جاني منه ريح ..
طرت من إيدي ..
وأشوف إنِّك ( فرحت ) !!

لا تصدِّق ..
كل من جاك بــ " مديح " ..
من عدوي ,
ياما واللـــه إنمدحت ..!

شمعة الفرحه من أخطائك ..
- تسيح !
( الغَرَق ) محتوم لك ..
مهما سبحت !!

منظر " الفرقا " ..
ترى جداً [ قبيح ] !!
مو نصحتك ؟
ليه يعني ما إنتصحت !!

صرت في وصلك عن عيوني شحيح ..
إنعمت عين الوصل ..
وينك !
سرحت ؟!

إعترف في غلطتك ..
خلك " صريح " ..
لا تكابر بـ الخطا دامك جرحت !!

كان ودِّك في فراقي تستريح ؟
بسمَع الموضوع كامل ..
لو سمحت !

خنتني !
وشلون ؟!
علِّمني الصحيح !
وين عنِّي رحت / عنِّي وين رحت ؟

كنت أظنِّك ..
من عيوني ما تطيح
لين في " عيني "..
إرتفَع غيرك ,
و ..
طحت !!

][ أُم العيال إنكسار حلم ][

إتصالك ..
إهتمامك ..
و
الوصال
وشخص " تايه " بين أفكارك وبالك !

مدري هي أقدار .. وإلا الحظ مال
من رمى الثاني على درب المهالك ؟

رغبتك .. في إغتنامك للـ عيال
وقلب حالم قال لك :
عمري حلالك ..

وعين شاعر يعشق أنواع الجمال
يستمد أبيات شعره من [ جمالك ] !

قصه كانت شبه .. أفلام الخيال
ويكفي إنَّ الجو في قلبي
صفالك !

تذكرين شلون تمشين بـ عدال
والمرض فجأه !
تجرأ لك وجالك ..

ومن يحبك يمسح دموعك وقال :
ليتني ..
أتعَب ,
وأمرض لك بدالك !

يااااهـ
يا ذيك السوالف والليال ..
كان قلبي طير و ..
أجواءه خيالك !

كنت أقول أبعد عن عيونك ؟!
- مُحال !
ولو وقف في دربنا عمّك وخالك

كنتي بنتٍ تسوى في عيني " رجال "
من كثر طيبك ومن وافر خصالك !

لين ما رحتي وتركتي لي سؤال :
من قدر يغريك في كذبه / وطالك ؟؟

في جنوبك كنت
والعالم شمال ..
[ إنِّي خيَّرتُكِ ]..
وإخترتي شمالك !

كان أسوء ظن و أسوء إحتمال
تحسبين حساب من جاك وعنالك !

إنهدم من غلطتك , قصر الرمال
وإنهدم كل الغلا فيني ...
كذلك !

ما يفيد الحين لو قلتي :
تعااال
قلبي من راسه ومن دنياه
- شالك

ما أبي منِّك بعد هذا .. إتصال !
إتركيني وإقطعي عنِّي وصالك !!

ماااات شاعر ..!
والمشاعر لا تزال !!
وما أظن ينفع بعد موتي سؤالك ..

والنهايه , شوفي يا بنت الحلال
لا حبيبك [ تَمْ ] ..
وما شفتي عيالك !

:

][ الوعد يوم القيامهـ ][

إجرحيني لا بغيتي .. كان لِكْ جرحي إبتسامـه
المُهم إنك تكونـي يـا بعـد ذاتـي.. سعيـده
روحي له الحين يالله وإسمعي صوته وكلامـه
ولا تشيلي هَم قلبي عِيشـي دنيـاك الجديـده
قولي إنك ما عرفتي فـي الحيـاة إلا غرامـه
وقولي إنك قبل حُبه تمشي في دربـك وحيـده
ولا تجيبي لي طاري وتسمعـي منـه ملامـه
سولفي عنِّك وعنه وصيري عن قلبـي بعيـده
وإن بغيتيني تعالي وعوِّضـي فينـي خصامـه
وصدقيني في النهايه إنتـي وحـدك مستفيـده
دام قلبي من غلاتك..... إيتفزز مـن منامـه
أشهد إنه حيل حَبك من وريـده لـي وريـده
وكان همِّي بس أشوفك طايره مثـل الحمامـه
وإن فرحتي كنت أفرح وأكسر بيوت القصيـده
كنت أشوفك في عيوني مثل (زرقاء اليمامـه)
وين ما قلبك يسافر كانـت عيونـي تصيـده
شفتي هذا الكون كلـه بالرجولـه والشهامـه
لـو بغيتينـي أبيـده .. والله لعيونـك أبيـده
كنت أحارب لجل حُبك والقوي أكسـر عظامـه
وكان قلبي لك أسيرٍ وكانت عيونـي شهيـده
قلبي والله من عرفتك صرت مدري وش علامه
كل ما صرتي في عيني شفت نبضاته شديـده
وقدرك اللي إنحنى لي وقلت: عـز الله مقامـه
عالي قدرك في عيوني وكل ما شفتـك أزيـده
إنتي لو عني تغيبي صـارت جروحـي يتامـه
خافي الله لا نويتي ولا تضحـي فـي عبيـده
كنت أسهر من غلاتك حتى ليلـي مـا أنامـه
وإنتي مشغوله بغيري ودُوم أشوفك تحت إيـده
كان ودِّي بس أحظى بحـب قلبـك وإهتمامـه
والشعر عنِّك أقولـه وأنتهـي منـه وأعيـده
كنتي أمنيتي بحياتي وكنتي في قلبـي مرامـه
وإن كتبتك في حُروفي صارت القصـه فريـده
وكنت أشعِل لك كفوفي لجل أنوِّر لـك ضلامـه
وإن خذيتي العِلْم مني تطلـع علومـي أكيـده
حتى لما كـان يرمـي كلَّهَـا فينـي سهامـه
كنت أضَحِّي في حياتي لـو نوالـك بالمكيـده
ما حشمتي قلب شخصٍ له شموخ وله كرامـه
وما حسبتي حساب ناسٍ همَّهَا بـس النقيـده
شاعرٍ ما رَد حتى ...علـى لبَّاسـي العمامـه
وقلبك إنتي صار فجأه والله يـا حلـوه يقيـده
في الزمن نادر وجودي ويا كثر فيه الرخامـه
وصار عادي في زمنَّا الأخُـو يقتـل عضيـده
الحديـده فـي إيدينـي والقضيـه.. إتهامـه
وإنتي القاضي وطبعاً ما تحسي فـي الحديـده
مركبي الغرقان بَسِّك لا تزيـدي فـي حطامـه
كل ما ألمح نجاتي صـارت أمواجـك شديـده
صدقيني حيل أحبـك والوعـد يـوم القيامـه
ويل من هو كان يكْذِب وكانت ذنوبـه جريـده
إتركيني لجل عينه .. كان لك حُبـه إبتسامـه
المهم إنـك تكونـي يـا بعـد أحمـد سعيـده
إنسي اللي صار كله وصيري له منبع هيامـه
وإن ذكرتيني بغيابي قولي عن روحـي فقيـده
ما أبي من قلبك إلا .. طول عمره والسلامـه
خَلِّي بالك من زمانـك دنيتـك هـذي عنيـده

][ قساة الكون ][

قساة الكون في عيني وقلبي ما إهتنى وما إلتـم
قسى هالوقت يـا قلبـي وضيَّـع كـل راحاتـي
جروحي فوق طاقاتي بكيـت وفـي عيونـي دم
رضيت آنا على القسوه وضاعت كـل بسماتـي
تعبتْ / وما صِدَقْ حَظي وفوق الهم أشيل الهـم
صغيرٍ في العمر آنـا وكبيـره حيـل مأساتـي
محدْ يدري عن أخباري محد في دنيتـي مهتـم
وحيدْ أمشي مع همِّي وكبيرْ الحزْن فـي ذاتـي
سِمَعْ قلبي عَنْ الراحَه واهيَّه مِنْ الوهـم أوهـم
أعيشْ آنا بوسط واقعْ نهاياتـي فـي بداياتـي
ياليت تفيدني الحسره ياليت أرتـاح لـو أنـدم
صعبْ أرتاح في الدنيـا حزيـنْ بكـلْ حالاتـي
سفينه مِنْ الصعب ترسى واهي مِنْ الموجْ تتحطم
أشوف البحر في عيني لقيـت المـوجْ دمعاتـي
كثير قلوب غرقانه واهي منْ الوقتْ مـا تسلـم
بحر هالوقت هَمْ يغـدر وهـذا معنـى كلماتـي
يا قلبي الطِيبْ ما ينْفَـعْ عشانـي ركِّـزْ وإفهـم
أنا ملِّيـتْ أعلِّـم فِيـكْ وإنـتَ تزيـدْ آهاتـي
أمانه كان لِي خاطـر مِـنْ اللِّـي صـار تتعلـم
ويا قلبي إتـرك الطيبـه بعـد قصـة مُعاناتـي

كلاب الساحهـ ـ ـ

ما هي غريبه إذا في خاطرك تجرح
قلبي تَعَـوَّد على النسيان وجراحه

سوَّدت وجه الغلا / ويحق لك تفرح
والراحه والله أبشرك ضاعت الراحه

ملِّيت أجْمَعْ طموحي وحضرتك تطرح
والقلب يسأل : دخيلك , وينْ مفتاحه؟

إن قلت [ تعبان قلبي ] جـد ما أمزح
الهَمْ دمَّر حصون القلب , وإجتاحه

جيتك مثل ( آدمك ) في جنِّتي أمرح
وإنتَ .. وش إنتَ؟ أكيد تكون تفاحه

ما كنِّك إلا البحر , وما عرفت أسبح
غدار طبع البحر .. ما فيـه سبَّاحه

وما كنِّك إلا طعوني , وطعنتك تذبح
في ذمتك شفت واحد حَب ذبَّاحه !؟

وشلون أحبك وأنسى غلطتك وأسمح؟
مو كل شـي لا تكسَّر تقدر إصلاحه

خسران أدري لأنـي ما عرفت أربح
يا خلف اللـه , على قلبي وأفراحه

ما فيه داعي لعذرك ما أبي تشرح
ما دام قلبك خذا من جرحي أرباحه

إبعد طلبتك وأنا في خير راح أصبح
إن رحت عني تكون أعصابي مرتاحه

القافله تسير دايم , والكِلاب تنبح
ويا كثر ما به كِلاب بداخل الساحه !

مات كل شعب الكويت !! .. ( مرثيَّة الشيخ جابر )

[ جابر الأحمد الصباح ]
لم يتوفَّى قائد ...
توفَّت بلاد ..!
.
.

الخَبَرْ جَاني: وأنا في النُـوم خَالِـدْ مـا صَحيـتْ
أسْمَعْ أصواتْ الشـوارعْ تَبْكِـي يُـومْ الله خـذاه
[ جَابِـرْ الأحْمَـدْ ] توفَّـى ليتنـي قَبْلَـه ياليـتْ
الحَياه / مِنْ غير جَابِرْ مالَهَـا داعـي الحيـاه !!
ما أبي (أبكي) ولكن .. دُونْ ما أشعر (بكيـت) !!
مِنْ غلاة إنسـان .. ربِّـي زارعٍ فينـي غـلاه
كيف ما أبْكي عليه !؟ وصورتَه فـي كِـلْ بيـتْ
دامْ حتَّى الأرْضْ تبكي مِنْ كِثِـرْ طيبـه وعَطـاه
يا وفاه إن جيتْ أسولف عنْ حياته ؟ و إنتهيتْ !!
ما أكفِّي ربع طيبه .. ومـا أجـي نقطـه بوفـاه
[جابر] اللي حتَّى بَحْره قال: مِنْ خيـره إرتويـتْ
كافلْ الأيتام منهـو .. سـوَّى بالعَالَـمْ سـواه ؟
:
ودِّي أتْكَلَّـمْ معـاكْ وغِيـر سَمْعِـكْ مـا بغيـتْ
والخبـر اللِّـي سِمَعْتَـه إطلعـتْ روحــي وراه
إسْمَعْ اللي صار فيني :بعد موتكْ.. ما حييـتْ !!
ومقْدَرَتْ رجْلي الوقوفْ وما نِفَعْ طِبْ وعصـاه !!
بعد موتكْ .. كيف حالي ؟ تصدِّق إنِّي ما دريـتْ
عايـشْ وميِّـتْ .. وقلبـي إمتلـى ضيقـه وآآه
كِلْ هالعَالَمْ دعا لكْ مـا هـو بَـسْ آنـا دعيـتْ
وكِلْ كويتي بَعَدْ موتكْ : إخْتَلَطْ صبْحَه بمسـاه !!
:
مِنْ توفَّى [ الشِيخْ جَابِرْ ] مَاتْ كِلْ شَعبْ الكويـتْ
لأنه هو ( نَبضْ البِلادْ ) وكِلِّنَا .. مِتْنـا معـاه !!

خبر عاجل .. ( مرثيَّة الشيخ زايد )

عسى ماشر؟ عساها خير! عسى ما به أحد تعبان؟
أنا مدري؟ أنا ضايع؟ أنـا أسـأل؟ أنـا أحاتـي
( دبي ) شاللي مزعِّلها؟ وأبُوهَا فارسْ الفرسـان!
( دبي ) شاللي يبكِّيها؟ و( زايد ) كِـلْ عباراتـي
( دبي ) شاللي ملِّبسْها السُواد وبإيدها الاكفـان؟
( دبي ) شاللي معزِّيها؟ ومِنَكِّّـسْ حِلْمَهَـا الآتـي
منُو اللِّي مَاتْ ما أدري منو اللِّي يطلِب الغفـران
منو اللي إنفقد فِيهـا .. وصَحَّـى نُـومْ آهاتـي
أحس الدنيا فِيها شَي أبَدْ ما هُو علـى الحسبـان
وإذا كان الخبر ( زايد ) عَسَاها تِمُـوت هقواتـي
صحيح اللي تقولونه؟ أو إنـي تايـه و حلمـان؟
أخاف إنْها إشاعَه مِنْ حقـود وقصـدَه حسراتـي
أبي أثبت لِنفسي وقلت: اب تعوَّذ مِـنْ الشيطـان
وأدوَّر إي قناه يمكـن تريِّـح خوفـي شاشاتـي
خبر عاجل: وفاة الشيخ:...... زايـد آل نهيـان
ولااا تِطلَعْ بدُون شعور وصُوتي ضـاع بسكاتـي
يا(زايد) لا تِكُونْ إنتَ يا وجه الطِيـبْ والتحنـان
يـا (زايـد) لا تخلينـي مـع همِّـي وونـاتـي
ابوي إنتَ نعم إنتَ يـا قايـد فزعـة الشجعـان
تمنيتك.. تخيَّلتـك.. لقيتـك ... عايـش بذاتـي
يا (زايد) أذكر إنِّي جيت وكلمتـك عَـنْ الغـزلان
أنا اللي جيت لي عِندكْ وسألتك عـن قصيداتـي
أنا اللي قلت لِكْ مَرَّه قِصيـدة يـا رفِيـع الشـان
أنا اللي كِنـت تِسْألنـي وتشجعنـي ف بداياتـي
صحيت..وكِنتْ بأحلامي وأثارينـي أنـا غفيـان
تشتت كِلْ ما شفتـه وضاعـت كـل طموحاتـي
يا كيف تروح عَنْ عِيني وتخلينـي أنـا عميـان
يـا نـور الارض والدنيـا نهاياتـك نهايـاتـي
يموت الخير والحِكمَه .. ويفْجَع كوكَـبْ الإنسـان
وأرثي ( الوالـد القائـد ) بخـط الدمـع أبياتـي
وشاللي بَسْ أبي أكتب وكيف أقدر علـى الأوزان
فقدت الشعر وأوزانـه وكِتبـتْ أبيـات دمعاتـي
عسى مثواك للجنه يا ( زايد ) يا إبـن سلطـان
وعسى يرْحَمْك مِنْ لجله رفعت إيـدي ودعواتـي
إماراتك سَبـعْ لكـن ب طيبـك تَمْلِـك الأوطـان
أنا [ كويتي ] وإذا شفتك أحـس إنِّـي إماراتـي

... الحَالهــ : زفتـــ !!
:
ياللي [ خَذاكْ ] الغير من سِبَّة اظروف
من جَنبي البَارح مَعَ [ ماخذَكْ ] طِفت

لا تَحسِب إنِّك يُوم مرِّيت .. مااا أشوف
سوِّيت نَفسي , مِن القَهَر كِنِّي ما شِفت

المَسألهــ : ما هي تغلِّي ولا خُوف
لولا غَلاتِك ؟ كَـان تلقاني مَا خفت !

أخاف يلمَح نظرِتك وإنت : ملهوف
وإلا يِشوف بنظرتي كم : تحسفت !

تذكِر حبيبي .. لمَّا أرسِم على الطوف :
حَرفك وحَرفي ومِن رسُومي / تأففت !

الكِل يِسأل : ( ليه ) مِن بِد الحروف
وياما [ براسِك ] مِن قَرايِب تحلَّفت

ومَرَّه زَعَلت وقلت مِنْ ضِيقِتي : اوف
وإنِتَ بِكيت وجيت تَركِض .. تأسفت

كِل الأغاني وخاصةً " جُروج وسّوف "
لو نَويتْ تِنسى اللي فات
واللي كَانْ .. والذكْرَيَاتْ
وإنُّ غِيرِي خَدْ .. مكاني
وتِسْألني عَنْ حَالي ؟ أنا حالتي ( زفتْ )

ما هو ( قهر عادي ) ولا صفقَة كفوف
شفتك مَعَ غيري .. وتمنِّيت : ما شفت !
:

عــلاقة حُــب "مجنـوونهــ" !!

تِصَدِّق وإلا ما تِصَدِّق .. أنا عَاجِزْ عَنْ التفكير
تعَالْ وشُوفْ في عينِكْ غِيابكْ وشْ عَمَلْ فيني
حبيبي ما بُقى عِندي صَبرْ .. يتْحَمَّلْ التأخيـر
رَحَلتْ .. وعِقبكْ الدنيا غلاها طاح مِنْ عينـي
أجَاوبْ اللِّي يسْألني عَنْ أخْبَاري وأقولْ بخيـر
وأنا لا خِير بغيابكْ .. ولا حَاجَـه .. تهنينـي
على طاريكْ كِلْ لحظه .. ولا أحتـاج للتذكيـر
حَريصْ القلب ما ينسَى عيونِكْ , لا توصينـي
مَحَدْ يِقْدَر يعَوِّضْنِي لأنِّكْ .. في عيُوني غيـر
ومَهْمَا شِفتْ أنا الفرحَه .. بدونِكْ ما تسلينـي
أنا خِنتِكْ .. وهالغلطه حبيبي ما لَهَـا تبريـر
علاقة حُبْ مَجْنُونَه .. ما بينْ أحزاني وبينـي
وكيف الحَالْ وشلوني .. جَوابٍ ما يَبي تفسير
بدونِكْ إنتْ , ما تِضْحَكْ حَياتي وترْمِشْ سنيني
مِثلْ شَاعِرْ عِجَزْ يوصَفْ شعُوره وخانه التعبير
أنا ضايع .. ولا أدري مِنْ فراقِكْ .. أنا ويني
مِثلْ طيرٍ كِسَرْ بُعْدِكْ جَناحَه وما قِـدَرتْ آطيـر
أحَاولْ أبْتِسِمْ وأنْسَى ولكنْ وشْ ينسينـي..؟!
أشُوفِكْ في صباحي إنتْ مَعْنَى يا صباح الخيـر
وأشُوفِكْ في مَسَائي حِلْم وردي .. لا تصحيني
تِصَدِّق .. السَهَر يَرْسِمْ عيُوني ويتْقِنْ التصوير
ويشِقْ النُور في صفحة حياتي .. وما ألاقيني
أنامْ شلونْ ومشكلتي عِجزتْ ألقى لَهَـا تدبيـر
طِلَبتْ النُومْ .. لحظاته وعيَّى النُـوم يعطينـي
تغيَّر وجْهَي .. مِنْ أوَّل غيابكْ وإبْتِدَى التأثير
حبيبي .. مِنْ التَّعَبْ كافي خذيتْ اللِّي يكفينـي
يا أغلى مِنْ رَحَل عنِّي يا كِلْ الحُبْ والتقديـر
تعَالْ: إنْ كان لِي عِندِكْ مَعَزَّه وكـان تغلينـي
تعَالْ: إنْ كِنتْ تعشقني وإذا فِعلاً تبي لي خيـر
تعَالْ: ومِدْ لِي .. كَفْ الوَصِلْ .. وآمِدْ كَفينـي
إذا كانْ الجِفا واجِبْ بدى مِنْ قلبـي التقصيـر
أبيكْ الحِينْ .. تِرجَعْ لِي ولا تِرجَـعْ تخلينـي
أنا ما أقولْ اللِّي صَار فِيني ما هقيتـه يصيـر
لأنِّي كِنتْ .. ( مِتأكِدْ ) .. بأنْ البُعـد ينهينـي

( نـزفـــ / نسفـــ ) ..!!

تعالي يا قصيـدة حُـبْ أبقطـفْ منّـك ورودي
أبي بيتٍ قويْ عطـره وكنّـي أكتـب إملائـي
إذا الساحه مثلْ حربٍ / أنا أشعـاري جنـودي
أبنسف كل منْ حاول يداهمْ أرضـي وأجوائـي
أنا لو كنت أحسْ إنه غيابـي يشبـه وجـودي
ترى ما جيتْ للساحه وقصيدي يعْجبْ أعدائـي
أفكّر وين أبي , وأبدء وأدري وينَهَـا حـدودي
وأصير بعينهم مُبدعْ غصبْ عنْ عينْ أخطائـي
وقلبي الأبيض إنْ ضاقتْ يصير بضيقته سودي
تحوّل هتْلَرْ بلحظـه مـع إنـه حاتـمْ الطائـي
كويتي وقطري وساعه إماراتي علـى سعـودي
وأصير بساعه بحريني عشانْ أشوفْ أصدائـي
عرفت الشِعْـر تفعيلـه وإلا يكـون عامـودي
ولكن ما عرفتْ إنّ الشِعْر بيكـون هـو دائـي
فديت اللي سأل قلبه وتضايق لحظـة صـدودي
يتابع كل مـا أكتـب ويهمّـه حتـى إطرائـي
أنا شاعر على كيفي / أنـا شاعـر وبـارودي
قلم , صفحه , وفتيلة قافْ ورسْمَه بلونَهَا المائي
يعني عاجبٍ حالي وواثق فـي خُطـا صعـودي
بِحَمْد الله وبفضله // أنا .. مُعجَـبْ بأشيائـي
وخلْ اللي زَعَلْ يزْعَلْ عسى ما شاف مجهودي
أنا ما شبّني غيري أنـا مـنْ فعْلـي أضوائـي
وإذا قال: العدو ( أحمد ) تردْ بصوتها جنـودي
قصايد عندي تمْنَعْني // أجاوبْ نَبْـح أعدائـي

.. [ المـُعـجــــزهـ ] ..!
:
ما هي .. [ قصة حُب ] , وإلاَّ ذكريات
للـ مشاعر ( جيش ) .. وقلبي مَرْكِزَه

صرتي لي " خامس جهه " لأربع جهات !
وصورتك في وسط عيني [ مبرْوِزَه ]

كنَّ ربِّي .. ما خلق غيرك / بنات !!
إن طروا غيرك .. أحس بـ " نرْفزَه "

وكنِّك إنتي جامعه .. كل الصفات !
الحلا ..
والزين ..
وعين [ مطرِّزَه ] ...

جاك قلبٍي وصرت عاشق تضحيات
و [ الهَدَف ] من شان " عينك " أحْرِزَه

إن خلطتي الماي في " سكَّر نبات " ..
وقلتي : " أحمد " إفرِزَه !!
راح أفرِزَه ...!!

في كلامك , يستلج فيني السكات
ومن جهل طبعك يظنِّك ( مخْرِزَه ) ..!!

واثق الخطوه .. وأمشي في ثبات
ويوم شفتك الخطاوي [ مهَزْهِزَه ] ..!

مو بـ كيفي هي كذا واللـه جات
قلبي كرسي " صعب " غيرك يحْجِزَه

عيشتي
دونك ..
يساويها ..
الممات !!
وإنتي عيشي .. في حياتي " معَزِّزَه "

يعني قبلك .. كنت أنا , كلِّي شتات
وصرت أجمعلك شتاتي .. و .. أكنِزَه ..!

وشي طبيعي .. لو يغارون البنات
للجمال [ أخبار ] .. وإنتي " مُوجزَه " ..

ومن يشوفك .. اللِّي يتكلَّم لغات
قام يخربط والـ ( إذا ) صارت ( إزَه ) ..!!

والثقيل اللي يسولف في سكات
من يشوفك عاش حالة / لعوَزَه ..!!

ولو
تبوسي
إنسان
له
أيَّام
مات
قام يركض !!
حَس قلبه ينْغِزَه ..!

وقلبي اللي نام في عز وسبات
غيرك إنتي .. ما أظن ( يفزِّزَه )

واللِّي قالوا لما جت : " الحلوه جات "
جنبك إنتي ..؟ صارت أكبر [ مَطْنَزَه ]

لا تغاري .. من كلام المعجبات
ماني مثل اللِّي .. يحب " الرَزْرِزَه "

ياما قالوا ( الحُب ) يصنع معجزات ..
وإنتي
[ حُبك ]..
في
حياتي
" مُعْجِزَه " ..

:

صـداقهــ ـ

إحنا ما ننْفَعْ نكمّل .. كل واحـد لـه طريـق
نخْتلفْ في ألف نقطه وحيل واضح الإختلاف
عيشي من غيري حياتك وإحسبيني لك صديق
مالنا في بعضْ قسمه وهذا هو حـد المطـاف
المحبه نهرْ صافي وقلـبْ إحساسـه رقيـق
وإنتي تمليك القساوه ونهْر يمليـه الجفـاف
ليه أحبك وأدري إني في بحر غدْرك غريـق
وليه أتصفّح حياتـك؟ دام عذّبنـي الغـلاف
إن عشقتك صدقيني كني عاشقْ لـي حريـق
الحَطبْ عمري .. وناركْ بس تاكلْ ما تخـاف
قلبي إختـارك وجيتـك طايـرٍ حـرٌ طليـق
ما ملا غيرك عيونه .. وياما في دنياه شاف
إحتمل قلبي وجودك وإحترى يصبح عشيـق
ما لقا فيك المزايا وإسمحي لـه الإنصـراف
أدري القصه قصيـره لكـن الكاتـب دقيـق
فصّل الموضوع كله وما على القصه خـلاف
إسمعي هذي القصيده صدْرهـا قافـه بإيـق
وإفهميها يا لبيبه .. عجْزهـا صعـبٍ بـآف
دام باقـي للمعـزه درب .. فينـا لا يضيـق
خلْ نخليها صداقـه .. ولا نفكّـر بالزفـاف

( م ــــحال ) .....!!

مِسكتك " حلم " في " واقع " رفض يحقق أحلامـي
مثل ذاك السراب اللي خذاني بعيد .. وما نلتـه !!
عليـك الله إرحمنـي ذبحنـي جرحـي الـدامـي
وسيفٍ رافعه بوجهي عشـان أرضيـك / عانقتـه
أشوفك " طيف " وأتخيِّل وجُودك وإنـت قدامـي !!
ولكن الغياب أقوى .. صِدمني وقـال: مـا شفتـه
لي الله صرت لطعوني ( هَدَفْ ) ولطيبتي الرامـي
أنا [ لا طاعني هذا الزمـان ] ولا بعـد طعتـه !!
حبيبي صَعبه أتحَمَّـل جُروحـي وعظَّـة إبهامـي
قضى صبري وكل حَـلٍ عشـان الحُـب ؟ جرَّبتـه
إذا لِك يُوم مِتضايـق ..؟ أنـا الضِيقـات أيامـي
وإذا لِك يُوم تذكِرنـي ..؟ أنـا النسيـان زعَّلتـه
وإذا جِسمِك تعَب , حتى أنا خايف مِنْ عضامي ..!!
أنا أمري إلى رَبِّـي .. مِـنْ الصَدمـات / سَلَّمتـه
محالٍ ألتقـي بنقطـه معـاك .. وأنصُـب خيامـي
ربيعك وين يا الغالي..؟ أنا أسمع فيه مـا عشتـه
أنا اللي كنت أسهرلـك وأقـول: لراحتـك نامـي
غفى بعض التعب فينـي وبعضـه فيـك سهَّرتـه
تِغمِّض جفنـي اخيـوط النهـار وألمـح أوهامـي
وأرجع أكتشف جفنـي معـك مـا يـوم غمَّضتـه
تعوَّد قلبي من صُـوم اللقـا , لا تجـرح صيامـي
لقانا تحسبـه ذنـبٍ غريبـه شلـون حللتـه ..؟
وش الحيلـه .. إذا أفقـد دواي وألمَـح آلامــي
لاجل أوصل إلى قلبـك طريـق المُـوت أسْلَكتـه
وفجأه صرت لك شاعـر وعينـك كانـت إلهامـي
وكل بيتٍ عجب غيرك لاجل أرضيك بس .. قلتـه
كأنك صَحرةٍ تُـورِد غيـاب // وينكِسِـر ضامـي
دخيلك .. قلبي الضامي .. أمانه ليـه كسَّرتـه ؟؟
يمُوت الحب لا يمكن , أموت ويبقى هُو " سامـي "
وإذا حُبك مثل ( سِيفٍ ) ......؟ تأكد إنِّي عانقتـه

( بــــ الحلم ـــــلاد ) ..!

:
جاني واحد قال : بسأل كم سؤال
وقبل يسأل قلت : أنا ماني خبير !
قال: جاوب بس , يا ولد الحلال
وكل كلمه حِطَّهَا .. بشطرٍ صغير
قال نبدي : شنهو تعريف المُحال..؟
قلت :
خَل هالكلمه فـ البيت الأخيـر ..!
القهر : إن شفت دمعـات الرجال
و الوطن : ( إنسان ) .. مِتغيِّر كثير

و الطفل : لعبه على شاطـي الرمال
و الأمل : إحساس في عين الضرير

الوفا : [ قلبين ] .. يجمَعهُم حلال
و الرَجُل : اللـي علـى أهلـه يغير

و الرجا : لا قلت : للواطـي تعال
و الفشل : مدري .. ولكنـه مرير

و الشعر : في وقتنا .. بدر و طلال
زين أوَّل : حيـل يعجبنـي جرير ..!
و الغلا : إحساس إلى حَـد الخيال
و العِشِق : لا شفت مَعشُوقِك تطير

و الجفا : إعكس مفاهيم / الوصال
و الوَصِل : يعني تأكَّد .. فيك خير

و العقل : تِسْفَه أقاويل , الجهال
و الجهل : إن قلت عن نفسك كبير

و الخطر : لا صار ما عندك مجال
و البلا : إن صرت معدوم الضمير

و العجب : لا صرت تسأل منهو قال
و التعب : إن كنت تِبْحَثْ عن مصير

الغنى : بالنفس .. ما هو راس مال
و الفقر : من كان .. بـ أعماله فقير
يكفي يكفي .. أسئله إنهي الجدال
ويـ الله علمني عَن .. السِّر الخطير
ما أبي تضرب لي في غيرك مثال
قول : عنِّك وإعتبر سِرِّك في بير
جات طعنـه مِن جنوبك والشمال
يعني وضعِك بين مِن حُولك خطير
صاحبـي وإن ضاقت بعينك ليال
لك فرشت القلب مفروش الحرير
في [ بلاد الحلم ].. ممنوع العقال
والمصيبه الشعب ما إختار الأمير
وما ألومك .. كان شدِّيت الرحال
دام بيتك جرح / وفراشك حصير
هذا تعريفي .. إلى كلمة : مُحَال
شيء ودِّك فيه ولا يمكن يصير ..!

قنبلة إحساس ..!

:
قول عادي .. بالي الليله طويل ..
شُوف لِك عذرٍ قديمٍ / وأقبِلَهـ !!

لا تحاتي ...
قلبي مِتعَوِّد يشيل :
( الجُروح ) اللي تجي له مُقبِلَهـ

" طيبتي " صارت مثل ( كف البخيل )
أيِّ شَي طايح .. تِشُوفـه ؟ تحمِلَهـ

و " عزِّتي " تقدر تِسَمِّيها : النخيل
لأني شامِخ .. والعواصف قاتِلَهـ
وعادي جداً .. إنِّي الليله ( عليل ) ..
الحزن : يحْسِبني واحد مِنْ هَلَهـ !!

ومو غريبه .. لو تِمَنِّيت الرحيل
البقاء أحيان , يعني .. البهذلَهـ !!

في غيابك .. ما لَهَا الضيقه مثيل ..!
وربِّي اللِّي .. ما يشاءه , يفعلَهـ

مِنْ يلاقي لـ دنيتي هذي بديل ..؟
خل يجيني أي شخص .. أبَدِّلَهــ

وعيب راسي لا بغى شي " مستحيل "
يوصله مو طيب .. غصبٍ يوصلَهـ

ليه راجع ؟!
ليه ذاكر ..؟
يـ الأصيل ..؟؟
إنت ضايق .. ؟!
في خطأ بالمسألَهـ !!

وليه تبكي مِنْ كلامي يـ الدخيل ..؟
المشاعر .. ما لَهَا بقلبك صِلَهـ ؟!

و( البلا ) .. إن حَبْ رجالٍ " ثقيل "
ينسى مِن حُوله ويسْمَع ( مُذهلَه ) !!

مِن عرفتك .. ما بقى بـ اليَد .. حيل
ولو بكيفي ..؟ [ قلبي ] محدٍ يدخلَهـ

ومِن عرفتِك .. حظِّي العاثر يميل ..
أعترف لِكْ إنِّي ( عاجز ) أعدِلَهـ !!

فاقد الإحساس / ما يعطي القليل
وإن عطيته إحساس قلبك ؟ يقتِلَهــ !!

إيه بـ أرحل والطريق أدري .. طويل ..
مشكلهـ " قربك " .. وبُعدِك مشكلَهـ ..

وإن خذاني المُوت إترك قال وقيل ..
قول هـ الجُمله .. وخطاك محلِّلَه :

[ ربِّي إلهَم أهلهـ الصَبر الجَميل
وإرحمـه يا رب وإحسِن مدخلَه ]

:

» . . Mms,/ الشاعر ( أحمد الصانع ) ..
» إهـداء للي يعشقـون إيذائـي}.. لـ أحمد الصانع
» أبــيــك أقــوى مــن جــروحــك تــحــدى هــالزمـان وارتــاح
» // مــن أجمــل مــا قيل عن الغـــيــرهـ //
» تـــوبكــآآت مــن ذكــورهـ .. لا تفــؤتكــوم ..