قدر الله علي وتقدم لي انسان مدري من وين جايبينه اهلي
( شكل ابوي دافع له عشان يخطبني ) .:o
وفي يوم اغبر... ناداني ابوي...وقال لي بالحرف الواحد
( اليوم جاء واحد وخطبك مني ..وانا اشوفه مناسب ,, بعدين انتي طولتي عندنا ) <<< حشى جبنه مو بنت
جيت اابفتح فمي واتكلم ..قال
( التفاصيل تفاهمي فيها مع امك )
طيب (آآآآآ..)
قطع كلامي
( وين القهوه ياولد ) <<<< يعني اذلفي
سحبت رجليني اللي مو شايلتني مدري من الفرح مدري من الروعه ورحت لامي اللي كانت
تتابع الحاج متولي للمره التسعتلاف مره
( يمه ابي اكلمتس بموضوع )
( وشو موضوعه )
( وش قصة هاللي خاطبني ؟ )
ردت وعلامات الدهشه المصطنعه على وجهها
( هو خاطبك احد!!! ) <<<< تموت امي في الخفاء ياااااقدمها
( ايه ابوي يقوله ):o
( هااااه....اجل علمك ابوك عنه ) <<<< توها تسأل هو خاطبك احد
( ايه ويقول تفاهمي مع امك )
( وش تتفاهمين معي وش دخلني منك لابوك ) <<< ديموقراطيه بائسه
( ابوي يقول روحي لامك وانتي تقولين روحي لابوك ..طيب ماودكم تعلموني شي عطوني رقم
الرجال وانا اكلمه )
( اقول انثبري بس واستحي وش تبين تعرفين ؟؟ الرجال ماعليه ولد ناس ويصلي ونشوفه
مناسب بس انتبهي تعلمين احد والا تقولين لبنات عمك والا صديقاتك اعرفك سترعنز )
( وشو عنزه وشو تيسه ,, انتم تشوفونه مناسب بس انا مااعرف للحين وشو وش هالحتسي مين اللي يبي يعرس انا والا انتم )
( وتبين تعرفينه بعد هذا اللي ناقص انا من بديتي تتنحين على هالترترنت وانا غاسلتن يدي
منتس ,,,, العلم وجاتس والرجال يبي العرس بعد شهرين يمديس تفصلين لتس دراعتين وتتقضين)
وقسم حسيت اني وضحى وبن عجلان
( طيب وشو منهو ولده وش يشتغل ؟؟واهم شي ابي اشوفه )
( تشوفينه ؟؟ ؟؟ هذا اللي ناقص بس علينا ,, مابه شوفه الا بعد الملكه)
( اذا تملكنا مالكم منّه ابشوفه وبطلع معه بعد ,,, الحين ابي اشوفه عشان احدد فيه ملكه والا لا )
المهم
اني انمسح بي سيراميك البيت كله ذاك اليوم..ولكن اصريت على موقفي ,, رغم التعذيب
والتنكيل والحرمان من الدش والنت,, وانتصرت اخيرااا (( يبون الفكه مني )
وبعد مداولات قال ابوي
( اسمعي ابخليتس تشوفينه عشان ماتقولين ان حنا رجعيين ( قل قسم )
ابناديه وبخليك تطلين عليه من الدريشه )
قلت لكم قسسسسسسسسسسسم اني بالقرن التاسع عشر
قلت ( لااااااااااااا ماابي
ابي اشوفه مثل الناس ويشوفني ..)
وبعد صوت مدوي كان مصدره ارتطام يد ابوي بخدي ...
قلت طيب دريشه دريشه,,,, نص العمى ولا العمى كله
وتحدد يوم الدريشه..وكنت على اعصابي ابي اشوف فارس احلام اهلي وش شكله
وجاء اليوم المشهود...وقمت من صلاة الفجر افكر في هالشوفه.. تصدقون اول مره
اعرف ان الوقت من الفجر للمغرب طوييييييييييييييييييييييييييييييييييييييييل..بغيت اموت
ماأذن المغرب..
واخيراااااااااااااااااا اذن المغرب
وارسل ابوي اخوي لي... وجاني مدرعم
( يقول ابوي ترى القهوه بعد عشر دقايق ) <<< قل قسم
فهمت طبعا انه بيجي بعد عشر دقايق وانقز لدريشه غرفة اخوي اللي تطل على الباب
الخارجي..وبعد ربع ساعه رن الجرس
ابد ابــــــــــــــــــــــــــــــــــــــــــــــــ ـــــــــد ماطاح قلبي برجولي
وشوي الا يدخل ذاك الشاب الوسيم الطوويل العريض اللي شوفته تجيب العافيه
ورحت وسكرت علي غرفتي...وبدت احلام اليقظه
مادريت الا امي تطق الباب وانا قد صار عندي ولدين ومسافره لباريس ( احلام يقظه )
قالت امي
( هاه شفتيه )
سويت نفسي مستحيه
( ماشفت شي دخل بسرعه بس انتم اهلي وادرى بمصلحتي ) <<< ايه هين
امي طبعا فاهمتني..تبسمت
وبس طلعت امي..كانت كل الشله والشلل المجاوره لها عرفوا عن خطوبتي <<< ستر عنز
ومرت الايام..ودارت الايام..
ودفع الرجال المهر وقال ابي العرس بعد شهرين بالعطله
قلت لامي
( شهرين مو واجد )
ماردت علي..بس فهمت وش تبي تقول
( قصدي مو شهرين شوي مااقدر اجهز بس بشهرين )
ردت
( اقول اذلفي عني ..)
وبديت اجهز...وكل شوي طالعه السوق..وناسه..فلوس واشتري اللي ابي
محد يقول لي وين رايحه وليه متاخره...المهم مر شهر وانا قمة الفله..
وامي كنها بدت تدلعني شوي يوم حست اني بذلف فعلا..
ومر اجمل شهر بحياتي...
وفي يوم اغبر من يوم خطبتي..كنت توي جايه من السوق...الا اخوي واقف عند الباب
ومعه واحد اشهب شوفته تجيب البلهارسيا..شكله طرار
دخلت ودخل اخوي بعدي..يتبسم وقال
( ايوه..من قدنا...اموت انا على حركات الحب والنظرات من بعد )
( عسى ماشر..وش فيك؟ شكل هالمحشش اللي انت واقفن معه معطيك شي )
( ايوه يعني اني مااحبه...يابنت مكشوفه انتي شكلك بتنهبلين عليه..مع اني للحين
والله ماني عارف وش محببك فيه...بس وافق شن طبقه )
(وشو حبه..وشو طبقه.. ...هيييييييييييييييييييه وش فيك )
( يعني اني ماادري من اللي واقفن معك...يابنت مو علي )
( من اللي واقفن معك ياكونان )
( خطيبك)
( خ..طيبي )
( ايه)
( ...بالله هذا شكل خطيب...هذا استبنة شيروكي.. ...اقول بلا مزح ثقيل
ماني رايقه لك..خطيبي مو هذا )
( مو هذا؟...احلفي عشان اصدقك...هيييييييييه هذا خطيبك
والله لو اني ماصبيت له القهوه ذاك اليوم كان اصدقك..)
( احلف ..)
( والله )
( لا اااا انت تستهبل صح..مو هذا اللي شفته..انا شفت واحد طويل مزيون
ابيضاني ..مو هذا قسم )
( خخخخخخخخخخخ لاتصيرين بس شفتي صديقي مشاري..تراه ذاك اليوم جاي قبله بخمس
دقايق )
يعني هذااااااااااااااااااااك خطيبي
استبنه الشيروكي هذا هو خطيبي
مسسسسسسسسسسسسسسسسسسستحيل
ورحت اركض لامي
(يمه صدق اللي عند الباب هو خطيبي)
( الحمد لله رب العالمين..وش بتس..وشو بابه ..وشو خطيبه )
( الاستبنه اللي برا هذا خطيبي؟؟؟ )
( اقول انتي عليتس قل صح؟ وش بتس عمى )<<< ويبونا نصير ناعمات وحنونات
( قولي لي اللي برا صح خطيبي والا بندر يمزح ؟؟ )
( وش دراني انا..اصبري اساله وبعدين لاصار خطيبك وش عاد..لاتكونين تبين تقعدين معه
بعد...تراك تسوينها )
( الله يرحم والدينك مو وقتك .. شوفي هو هو والا لا )
ونادت امي اخوي بندر وسألته وطلع صح هو..واللي شفته مشاري صديق بندر
استجمعت شجاعتي ( لاني عارفه وش بيصير لي ) وصرخت
( لااااااااااااا مااااابيه...ماابيه....مو هذا اللي شفته )
الكل وقف مذهول يطالعني..وامي نقزت وحطت يدها على فمي
( انطمي لايسمعك ابوك )
ابعدتها عني
(لا مو هذا يمه...ماابيه مستحيل اتزوج الشي اللي برا هذا...مستحيل )
( اقول يوم دفع وصرفتي قريشاته وعطيناهم كلمه واستعد الرجال جايه تقولين ماابيه
وش نقول للناس؟؟ الرجال لعبه عندتس؟؟مااعجبك؟؟؟ اقول اسكتي لايسمعتس ابوتس
وتصير نهايتس الليله)
وبالصدفه قربت نهايتي..لاني سمعت صوت ابوي وراي
( وش فيه..صوتكم جايب اخر البيت...حريقه؟؟ والا مات احد؟؟؟ )
وقف قلبي من الخوف...
ايه..يوم يجي ابوي على صياحي..
مالكم بالطويله..ابوي عرف ان السالفه تتعلق بي...
وقتها كنت منهاره وجالسه ابكي
( ماااااااابيه .........مااااااااااااااابيه )
سأل امي وش السالفه وامي طبعا علمته السالفه بالبهارات
( وش هالحتسي؟؟ ..وشو اللي ماتبيه؟؟؟ نلعب حنا )
( تقول انه ماهوب هو اللي شافته )
( من شافت اجل ؟؟ ووين شافته )
( حصل غلط وشافت صديق بندر بدل ماتشوفه هو )
( وانشاء الله تبينا نروح نجيب لها صديق بندر )
(اطلعوا وخلوني انا وياها )
ساعتها حسيت ان الاستبنه ارحم من اي شي ثاني ممكن يصير لي الحين
طلعت امي وبنيدر الله لايعيده لاهو ولا صديقه ..وفجأه تكلم ابوي بهدوء
( تعالي وانا ابوتس اقعدي )
صراحه حسيته ملعوب يبني اقرب عشان يتوطاني ماقد شفت ابوي حليل كذا
( تعالي قلت لتس ) <<< ايه كذا انت ابوي الحين اقدر اجي
وقعد يسبحن علي ويحاول يقنعني ان الشكل مو مهم وان الرجل مناسب واهله ناس مستورين
وان الحين ماعاد فيه رجال والبنات قامن يخطبن الرجال والمحظوظه اللي تلاقي لها رجال
يضفها <<<< ملحق مو بنت
وكل ماجيت احتسي ..قال خليني اكمل..
خليته لين قال لي كل اللي ببطنه ...بعدين قلت
( بس انا ماابيه..لو اقعد طول عمري مااعرست ماابيه )
حسيت لون ابوي تغير اقرب ماله البنفسجي ...يعني تراها مهيب سهله عليه يقعد
ساعه وهو هادي حسيت انه كان ضاغط على نفسه جداا والدليل اللي بتسمعونه الحين
( اقول..اسمعي..علمن ياصلتس ويتعداس..الرجال وبتاخذينه..والملكه بعد اسبوع على موعدها
وكانك بنت رجال سوي شي بس والا قولي لا ) << ماحبيت اهزأه فسكتت
طبعا طلعت ابكي..واصرخ.
ماااااااابيه..ابذبح روحي قبل اتزوجه...لو تموتون ماتزوجته.....الخ
ومامن مجيب...
سويت اضراب عن الاكل والشرب...ولاجاب احد خبري...نقلوني للمستشفى في حاله
هبوط ضغط...واحنا راجعين من المستشفى قال ابوي..
(اسمعي والله لو اشبك بك مغذي لين العرس بتاخذينه بتاخذيه
ماعلينا قاصر فشايل مع العالم)
والله ساعات ياناس احس ان اهلنا متبنينا من ملاجيء..والا مانين علينا انهم اهلنا
قلت له
( والله لو اني مسويه لكم فضيحه وبتسترون علي كان اعذركم..بس حرام عليكم
هذا جزاي اني ماشيه اباري الساس... )
رد علي
( بعد بعد...لو انتس ماتبارينه كان الحين تحت التراب ) <<<
المهم...تحددت الملكه...وجاي اليوم النحس
لارحت ولاتزينت ولا سويت اي شي...وامي بس تروح وتجي علي
(يابنتي..يهديس...يرضيس...قومي عدلي خشتس..حطي بودر..مشطي هالشوشه الرجال
يبي يجي وانت كذا)
( ماابي...ولاني طالعه لاحد...ولا متزوجه احد واللي تبون سووه )
( يابنتي ادحري الشيطان ..والله ان يدفنس ابوتس هنا ..)
( يدفن...يسوي اللي يبي....والله كني على قلوبكم..حرام عليكم )
وجلست ابكي وكن امي حنت شوي...بس مازالت مصره
( خلاص قومي غسلي وجهتس ومشطي شوشتس )<<< وش رايكم بامي بس
وجاء المغرب..<<<<<<<<<< اكررررره هالوقت الله ياخذ مشاري
وانا اسمع قرقعه ورجده تحت...وبيني وبينكم كنت مرعوبه حتى الموت...بس يقال لي
بصمد واتمسك بحقي اللي يكفله لي الشرع
طق الباب والا هو ابوي
( اسمعي..الشيخ يبي يجي بعد شوي...لا سألك ترضين قولي ايه...وبعدين الرجال يبي
يشوفتس ..والله ثم والله لو خبصتي لايصير شي مايرضي احد )
حسيت وقتها بالقهر..بالظلم..بكل انواع الاحاسيس اللي مهيب زينه
وفكرت..قلت وربي هالاستبنه ارحم من هالاهل...وقررت اني اواجه مصيري الاسود
قمت ومشطت شوشتي ولبست طقم اسود ..ولاحطيت على وجهي اي
شي ..وقعدت انتظر..
وجاء الشيخ...وتمت الاجراءت وانا غير مستوعبه اي شي...
فجأه..قالوا لي الاستبنه يبي يشوفك يالله عشان تدخلين عليه..
دخلوني على الكائن الفضائي اللي مفروض يصير زوجي...يوم شفته حسيت بالغثيان
يذكرني
قلت في نفسي هذا خلاصك من بيتكم...يمكن يطلع اخلاق لاتستعجلين...
جلست بعيد عنه...وجلست اطالع صندلي..اكتشفت ذاك اليوم ان صندلي فيه كريستال موف
شوي الا ابوي واخواني طلعوا..
نقز شين الوجه جنبي
( تسيف الحال )
( الحمد لله )
( ماشاء الله عليتس جميله ) <<< اقول انكتم بس
(وش تشجعين )
( طيب...تعرفين تطبخين )
اول مره احس اني ودي اصفق احد فعلا
( مستحيه .... زين احسن من بنات هاليومين منزوعات حيا )<< تقرب له امي
اكررررررررررررررررررررررهه ...والله اكررررررررررررررررهه
ماقدرت اتحمل طبعا
طلعت وخليته...ورحت غرفتي والدنيا سودااااااااااااااااااااء زي صندلي
وجاء بكره...
قمت من النوم على صوت جوالي يدق..طبعا ماقدرت انوم الا بعد ماطلع الصبح..والتليفون
رن الساعه عشر الصبح..
( نعم )
( صباح الخيرررررر ...عرفتيني )
لااااااااااااااااااااااااا رحماك ربي
( مين معاي ) <<< وانا عارفه
( انا ( الاستبنه ) )
(.....................) <<< يعني ساكته يالله صباح خير لاشر فيه
(ايه حبيبتي وشلونتس ) <<<<<<< لااااااااااااا لاااااااااااااااااااا
يسمع الاخ بالحب
(لو سمحت انتبه لالفاظك... ؟ )
( ياسلام على اللي يستحون...احب البنت الجد ) <<< حسيت انه راعي مغازل مدري ليه
( تبي شي ؟ )
( لا حبيت اصبح على ام عيالي )
الله لايقوله ولا يكتب لي جراذي منك
حامت كبدي بجد...صار كل يوم ينقز لنا بالبيت...وتليفوني سكرته من كثر ازعاجه
وكل يوم كرهي له يزيد...
كلمت امي قالت خلاص انتي الحين متزوجه يعني اي شي بتصيرين مطلقه...انسي
انسي حكايه انك تتركينه...
فقدت الامل ..وحسيت بان كل الابواب متسكره..اهلي ماعندهم تفاهم...وعريس الغفله
لو جلست معه يوم واحد كامل بموت من القهر..وين اروح وش اسوي
حسبي الله عليك يامشااااااااااااااري
وقرب موعد الزواج...وانا كل يوم يزيد حالي سوء...نقصت 10 كيلو..صرت عظم وجلد
اطالع نفسي في المرايه...والله مابي شي شين عشان يرموني اهلي هالرميه يعني
عشاني تعديت 25 ...طيب وخير ياطير
جلس ابوي يرفض يرفض وبدون مايعلمني..ويوم الناس اكلوا وجهه رماني هالرميه
المهم قرب الزواج...
كل يوم يمر احس ان نهايتي تقرب...والله ماابيه...مااااااااااابيه ..مستحيل اتزوج هذا
مااتخيل نفسي معه...لا المصيبه هو طايح علي طيحه شينه...كنه ماشاف نعمه
وقبل الزواج بيومين دخل علي اخوي بندر.. كنت جالسه ابكي...وحابسه نفسي بالغرفه
جلس جنبي...لاول مره احس ان احد من اهلي قريب مني
( وش فيتس ...؟ للحين ماتبينه ؟ )
( انت عارف )
( وش فيه طيب؟ مستور وطيب لايدخن ولايشرب صحيح دمه واقف بس الرجال شاريتس
وحالته ميسوره مدرس راتبه زين ) <<< اكره المدرسين
(بندر..مااااااااابيه...مابييييييييييه..حسوا فيني حرام عليكم )
( طيب انتي بتتزوجينه لازم تتأقلمين )
( مااظن اعمر معه...يابموت...يابذبحه ... يابرجع لكم بشناط العرس )
( متأكده انك ماتبينه؟..متأكده انك تقدرين تتحملين لقب مطلقه؟؟)
( اتحمل اي شي يابندر بالدنيا الا وجهه )
( للدرجه هذي )
( اكثررررررررر يابندر..اكثر )
( فيه في بالتس احد ثاني غيره )
( لااااااااا مافي بالي احد..بس ماابيه )
وطلع بندر....نص ساعه الا اسمع برا صوت ولجه وحوسه...انفتح الباب علي فجأه الا هو
ابوي...دخل ووجه تعابيره غريبه
( انتي للحين مصممه انتس ماتبيه )
( لاخر يوم بعمري )
( وتبين ترجعين لنا مطلقه؟؟ ) <<< قل قسم
( هذا اذا ماذبحته والا ذبحت نفسي )
(طيب )
وطلع
بصراحه انا صرت كذا..
جلست بغرفتي اترقب...اسمع حوسه...شوي الا ناداني ابوي..بالمجلس
لقيته هو وبندر وامي..
( اسمعي هذا بندر اخوتس..يقول انتس بترجعين لنا مره ثانيه..وانتس معزمه ماتبينه
ويقول انه بيوقف معتس ..وانتس بوجهه..) <<< حرب البسوس حشا
( انا ابي مصلحتس واشوفه مناسب لك..لكن اذا الدعوى بتوصل طلاق قبل االدخول..
انا ماابي بكره ترجعين لنا ومعتس بزران مطلقه )<< وش صحوة هالضمير
( وبعدين الموضوع وصل لعمتس ناصر وتوه مكلمني ..اخوتس علمه )
اهاااااااااااااااااا الدعوى فيها عمي ناصر...وين كان غايب عني كل هالمده
والله اني دجاجه...اعرف ابوي يخاف ويحترم عمي ناصر كثيررررر كيف مافكرت
الجأ له؟؟؟؟؟؟؟؟؟؟؟
كم انااااااااااااااااا غبيه
المهم ماادري وش سوى بنيدر النمس هذا وخبص السالفه وخلى ابوي يلين...قام ابوي
اتصل على الاستبنه واحنا عنده
سلم عليه وفهمه بهدوء ان الزواج قسمه ونصيب وان مافيه نصيب وبنرجع لك كل اللي دفعت
وكل واحد يروح بحال سبيله..
فجأه تغير وجه ابوي...وقام يصارخ
( وش هالتحسي.. وتقوله قدامي بعد..؟؟..البنت ماتبيك..وحنا غاصبينها ترضى على نفسك
تتزوج وحده ماتبيك..؟؟ )
( دام هذي علومك اجل خيره اللي كلمناك الحين..بينا وبينك الشرع )
وسكر ابوي السماعه...ساله بندر وش فيك يبه وش قال الرجال؟؟
قال ابوي وعيونه بالارض
( يقول مانيب مطلق..لو ادخل عليها يوم بس بعدين اطلقها )
اتصل ابوي على الشيخ وساله قال اذا البنت ماتبيه ترجع له مهره ويفسخ العقد غصبن عنه
وفعلا ابوي تحمس واخذ الموضوع موضوع عناد..
وطلقوني منه قبل زواجي بيومين...
والحين انا مطلقه...وانا ماتزوجت <<< يمديكم
انحسبت علي تجربه...وانحسب علي لقب كريه...وتوابع للقب هذا بدون اي اختيار او ذنب
لانفع ابوي ندمه...ولا امي سلبيتها...ولا نفع كل اللي سويته..
ولو ماوقف بندر معاي كان الحين ماادري ايش حالتي...
شفتواااااااااااااا ان الشوفه مهمه....الاسلام كفل لنا حريه تمنحنا الحق في الاختيار والقبول
كفل لنا حقوق للاسف مجتمعنا حرمنا منها.. لمجرد ان احنا حريم...
الزواج بالذات..قرار خطير ومهم..يقع خلفه تبعات كثيره..اسره واطفال وبيت...اذا ماكان
مبني على قناعه وموده..ماراح يستمر اطلاقا..والضحايا كثير اولهم الاطفال والمرأه
وبسسسسسسسسسس
خلصنا..
القصه بتصرف من الواقع....
السبت يونيو 06, 2009 4:20 pm
