انكســـــاااري....}لـــ { دلوعــ ــ ــ ـة اهلها }..((كامله)

دخل وهو يغني ويلعب بميدالية المفاتيح..


مقادير ياقلب العنا..
مقادير وش ذنبي انا..
وتمضي حياتي
تمضي حياتي...
مقادير...


لقى ابوه وامه بالصاله.. سلم وهو يلوح لهم بيده..وكمّل طريقه ..
وقفه صوت ابوه..

ابو فراس:تعال اجلس بكلمك بموضوع..


سكت وهو يتفحص ملامح ابوه..مافي غير هالموضوع اكيد...قال وهو عاقد حواجبه..

زياد:مايتأجل هالموضوع...بصراحه راسي دايخ

ابوفراس:لا ..اجلس اجلس..


مط بوزه وجلس

زياد:آمر..

ابوفراس:نوال جاها خطّيب..
زياد:مبرووك وان شاء الله يستاهلها..

ابوفراس:زيـــــــاد


عقد حواجبه ونفخ هوى من فمه يحاول يتمالك اعصابه
زياد:يباه قلتلك مااابيها وهي ماتبيني..خلها تشوف نصيبها
ابوفراس:والحلال يروح للغريب مايكفي اختها
زياد:احسن من تقعد طول عمرها كذا
ابوفراس:انت اللي اسمع..لو نوال ماتبيك كان مشّيت هالموضوع..بس هي تبيك وتحبك..
زياد:مستحيل..
ابوفراس:روح اسألها..وبوضحلك شيء..اذا مااخذتها خلال هالاسبوع بتطلع من هالبيت ولاني ابوك ولا تعرفني وحتى صلاة علي ماابي تصليها ساامع
ام فراس:يابو فراس
زياد:يباه ليش
ابوفراس:اللي قلته مابي اعيده..هالبنت بذمتي..وهي تبيك وتحبك ومابي اظلمها مع واحد الله العالم شيسوي فيها..
زياد:وحنا مارح نزوجها واحد مايستاهلها..بس
ابوفراس:بس ايـــش؟؟؟زياد فكر بكلامي..ويارضاي ولا غضبي عليك ليوم الديـــن...


قام وهو معصّب... ورقى الدرج بسرعه..


وصوت الميداليه يخترق السكون..ويزيده توتر..


وصل لغرفتها ودق الباب بالمفتاح بدقات متتاليه...


انفتح الباب.. وابتسمت اول ماشافته..

نوال:هلا زياد

ضغط على الميداليه بيده ...

زياد:انتي وش قايله لابوي؟؟؟؟

مسكت اصبعها الوسطي وبدت تفركه..
نوال:ماقلت شيء

زياد:انتي تدرين ان فيه احد خطبك

نوال:ورفضت..

عقد حواجبه..
زياد:ليش..؟؟؟

نوال:علشانك...زياد انا مستحيل اتخيل نفسي بعيد عنك..زياد انا احبك معقوله ماتحس فيني..ماوصلك شعوري..زياد انت لي انا وبس

مصدوم من اللي يسمعه..اللي عمره مافكر فيها اكثر من اخت تطلع تحبه..هذي تكذب علي ولا على نفسها..

قرّبت منه ومسكت ايده وشدت عليها

نوال:خلنا نتزوج وبنعيش احلى حياة..اصلا انت مو مرتاح مع ليلى..

شد على ايدها وكأنه يستجوبها..
زياد:مو مرتاح؟؟؟منين عرفتي؟؟وشدرااك..هي شكت؟؟؟

نوال:لا ماشكت...بس انا احس فيك..اعرف وش فيك من نظرة عيونك...محد يفهمك كثري..زياد انا مو بس احبك انا ا ...ودارت على نفسها قبل ماتطيح الارض بسبب الكف اللي هوى على خدها..رفعت عيونها له وهي فاتحه فمها

زياد:ماتوقعتك بهالوقااحه..ان شاء الله هالكف يصحيـــك..ودار بظهره وتركها..



انسابت دموعها على خدها الساخن ..وكلمته تتردد بداخلها..

يصحيك..يصحييك..يصحيييك...
ووقفت ودخلت غرفتها وقفلت على نفسها...










*************************










تحسست رقبتها واستقرّت يدينها المرتجفه لتحت اذنها..الورم صار واضح..اكيد انتشر بكل جسمي..
مسحت دموعها بسرعه اول ماهجمو عليها عيال اخوها..

سديم:ابيييييييييييييير
فتحت يدينها لها وضمتها بقوه..
عبير:يارووح وقلب عبييير...تعال تعال ماتبي تسلم علي ولا صرت رجال
ناصر:ايه رجال..بس بسلم عليك
ابتسمت ودموعها تنزل..وسحبته لحضنها...ايام وبفارقكم..بتحسون بفراقي؟؟؟ بتبكون علي؟؟؟
ناصر:عمتي ليش تبكين؟؟؟
عبير:مافيه شيء بس عيوني تعورني..انزلو والحين الحقكم..
سديم:ماما تقول انزلي بسرعه...
عبير:ان شاء الله..يلا يلا برى..
انصاعو لاوامرها وطلعو..وهي بسرعه راحت تغسل وجهها بمويه بارده تنعشها وتخفف من اثار الحزن اللي عليها..وقبل ماتنزل حطت بودره خفيفه على وجهها وبلاشر وفكت شعرها علشان ماينتبهون للورم...













***********************














بعد صلاة العشـــــاء...



في مجلس الرجال بمنزل خالد...



بروح اشوف العشاء وش صار عليه..وغمز له وطلع..

قصّر على القناة اللي حاطينها والتفت عليه
عبدالله:اقول محمد..شخبار رابح؟؟انت للحين علاقتك معاه..زينه

هو جاي هنا يبي ينسى..يبي يحاول يتجاهل هالموضوع..ضميره يعذبه..

قال وملامح وجهه بانت عليها الحزن

محمد:..رابح...


عبدالله:من ملامح وجهك شكلك عرفت انه مات..الله يرحمه..


بصوت مخنوق ومبحوح قال..
محمد:قريت الخبر بالجريده..ماني مصدّق..

عبدالله:محمد من غير لف ودوران وانت عارف اسلوبي زين وتدري اني ابي مصلحتك وخايف عليك...انت لك علاقه معهم؟؟؟


عقد حواجبه وهو مستغرب

محمد:علاقه مع مين؟؟؟


عبدالله:مع الارهابيين..ترى الموضوع اخطر مما تتصور وانت تدري ان السالفه فيها امن دوله..فاهم قصدي
محمد:لا مالي علاقه فيهم..اساسا ماقابلتهم..اللي له علاقه هو رابح...حاولت امنعه..بس ماقدرت
عبدالله:تمنعه؟؟؟يعني انت تدري انه معهم
محمد:ايه..ونصحته بس مااقتنع ووعدني يكلمني ويقولي وش يصير له اذا قابلهم..رجعت للرياض وانقطعت اخباره حاولت اتصل فيه بس جواله مقفل..هو كان مقتنع بكلامي بس قال لازم يسمعهم..واختفى شهر ونص وماقريت خبره الا بالجريده..
عبدالله:يعني علاقتك معاه مانقطعت..وعاندتنا ومشيت معاه
محمد:هذا اللي صار..
عبدالله:ووشلون تعرفتو عليهم


سكت..ماعنده رد..هو ماصدق على الله ماحد درى بسالفته..يروح هو ينشرها..


قطع افكاره صوت خالد اللي استمع لحوارهم...

خالد:محمد..شفيك..

رفع عيونه تلقائيا له...

محمد:ها لا ولاشيء...حطيتو العشاء


عبدالله:مو قبل ماتجاوب على سؤالي


محمد:قلتلك مادري شلون تعرفو عليه..وهو تاب وقاللي اتعرف عليهم كانت نيته زينه..
ويوم شرحلي الموضوع عرفت انهم الارهابيين..نصحته والله العظيم نصحته بس هو ماسمعني..كان يبي يسأل بنفسه..انا ماالي دخل ماااالي دخل والله العظيم مااالي دخل..لو ادري بيصير فيه كذا ماسكت..بس ماتوقعت الامور توصل لهالدرجه..ماقدر يكمّل ..حس نفسه مخنوق...

وطلع بسرعه..


لحقه ..
خالد:محمد محمـــــــد..محمـــد..ومسك ايده ووقفه...وين رايح؟؟؟
شاح بوجهه بعيد عنه وركز انظاره على باب الفيلا ..
محمد:خالد برجع للبيت..ابي انااااااااام ابي ارتاااااااح
خالد:نام عندي احسن..
محمد:لا مااقدر..فيصل مسافر وابوي وجدتي لازم اكون معهم
خالد:طيب بوصلك للبيت..علشان بس اتطمن
محمد:لا خلك مع عبدالله..وبعدين انا جاي مشي ومو من بعد البيت...
خالد:ماهو طاير ابو شنب..وثانيا انا ودي امشي معك...امش امش..










وصّل اخوه ورجع بسرعه لعبدالله..
دخل المجلس وكان باين عليه التفكير..قطع افكار خويه
خالد:سمعت اللي قاله..والله اني مستغرب
سحب شماغه وعقاله
خالد:على وين على وين
عبدالله:للبيت..
خالد:والعشاء
رمى شماغه وقال وهو رافع حاجب
عبدالله:تهقى اجبروه يسوي العمليه؟؟؟
خالد:مااستبعد شيء..يمكن خافو لايبلغ عليهم..وهو صغير وبعدين يقدرون يجبرون الكبار مو عاد اللي بعمر رابح
عبدالله:اكيد..محمد يقول انه نصحه واقتنع بكلامه..بس راح يسألهم ويتأكد..وهو المسكين مايدري ان دخول الحمام
خالد:مو مثل خروجه...الله يرحمه ياارب..محمد باين عليه التعب خايف عليه
عبدالله:ماينخاف عليه..عقب هالسالفه تطمنت عليه طلع رجاال
خالد:رجال..والله ماهقيت..انت ناسي وش سوى من قبل..هذا رجال بمواقف وبمواقف الله يستر عليه..خبل خبل
عبدالله:لا بس انت الذكي..هي على مين يابو الشباب تلعب... ناسي وش سويت بمراهقتك؟؟؟
خالد:انا للحين مراهق..تبي تتكلم عن نفسك انت حر..
عبدالله:هههههه قووم قوم حط العشاء مت جوع
خالد:هذا هو جاهز بالمقلط..حياك حيااك..













*****************************















الشرقيّه...


دفّها بقوه على الارض متجاهل كبر سنّها وصرخ فيها
ابو محمد:شلووووون تتصرفين من ورااااي شلوووووون
مسكت ظهرها بيدها وقالت وهي عاقده حواجبها..
ام محمد:هو ولدي مثل ماهو ولدك..انت غلطااان عليهم وفوق هذا كله بتعذب ولدك بقبره..
ابو محمد:وانتي على بالك ولدك بيرتاح وهو يشوووف نويصر عااايش..نويصر اللي اخذ اعز مانملك..تكونين سعيده وهو يرجع لابوه ومستانس..
ام محمد:عمري مارح اسامحه..بس شتبيني اسوي وانا اسمع بنت الناس تدعي عليه كل يوووم...
ابومحمد:وعلشان كلمتين تهتزين..خليها تدعي ليوم الدين وش علينا منها

ام محمد:ايه انت ماعليك..بس ولدي هو اللي بيتعذب..ابو محمد انت ناسي وش سويييت..ناسي ليش ناصر ذبح محمد...انت السسبببب انت اللي المفرووض تموووت مو ولدي..ايه انت ..انت واختك الله لايرحمكم لادنيا ولا اخره..


مال بجسمه لقدام ومسك ذراعها بقوه وقال بتهديد
ابو محمد:من بكره تروحين وتتراجعين ولا بيصيرلك شيء ماشفتيه


ام محمد:ماعندي ولد ثاني علشان تحرمنياه
ابومحمد:وش تقصدين؟؟؟
ام محمد:يعني مو متراجعه..واعلى مابخيلك اركبه
ابو محمد:ان تنازلتي مارح تبقين بذمتي دقيقه وحده
ام محمد:من غير ماتقول..انا مستحيل اعيش معك..لاني كل ماشوفك اتذكر انك سبب موت ولدي...وخّر عنّي..وسحبت ايدها وطلعت لغرفتها تلم اغراضها...







0
0
0










الصبـــــــــاح....
الثلاثـــــاء...




دخل على الشيخ وهو يسلّم..وجلس قباله..
الشيخ:كيف حالك ياناصر..
ابتسم بود للشيخ
ناصر:بخير زان حالك..
الشيخ:انا جاي بسألك..اقتنعت بكلامي..
ناصر:ياشيخ..قلتلك من قبل..اللي سويته ذنب عظيم..ويومي كله يروح بالصلاة والاستغفار لربي علشان يتوب عني..انا الليل مانامه ..مو سهل علي اني اذبح شخص واطلع روحه واحرمه من اهله..بس اللي صارلي شيء كبير..وماقدرت استحمل..
الشيخ:بس كان فيه الف طريقه وطريقه...ولا تنسى الكاظمين الغيظ..
ناصر:الشيطان يجري بابن ادم مجرى الدم..وانا تبت واستغفرت ربي..
الشيخ:الله يقبل توبتك..رحمة الله وسعت السماوات والارض..واوجه الخير كثيره..الابتسامه بس بوجه اخيك تاخذ عليها اجر..
وانا جاي لك اليوم ببشاره..
ارتسمت على شفايفه ابتسامه وبدى قلبه بالخفقان..بس سرعان ماختفت هالابتسامه وهو يستبعد هالخرافات اللي يفكر فيها..
وقال وهو يشوف الارض
ناصر:بشرني..
الشيخ:اهل القتيل تنازلو...وبتطلع بهاليومين..
هو يتخيل..او يحلم..هو سمع زين ولا يتهيأله..سكت..وهو يفكر باللي سمعه..
ابتسم الشيخ وعرف انه للحين مو مستوعب..
الشيخ:ناصر الله استجاب لدعواتك ودعوى اهلك..وبتطلع ان شاء الله..احمد ربك واسجدله سجود شكر..
رفع راسه له وشفايفه تهتز..
ناصر:ياشيخ...انت....شتقول؟؟؟
وقف الشيخ وضم ناصر اللي جالس وسلّم عليه وباركله...
ثواني استوعب ان اللي صار مو حلم..وخر على الارض واول ماتلامست جبهته وخشمه الارض خر بالبكاء وهو يحمد الله بصوت عالي ...














**********************














رمى السماعه وركض وهو يقول بصوت عالي..
ربي لك الحمد ربي لك الحمد ربي لك الحمد..
دخل مكتب اخوه وضمه وهو يقول
ناصر ناااصر ناااصر..

استبشر خير وضم اخوه اكثر وقال

ابو فيصل:وشفيك ياخوي الله يديم الفرحه عليك
ابو سليمان:ناااصر تنازلو بيطلع اتصلو ناصر نااااصر
ابو فيصل:الحمد الله الله يبشرك بالخير اهدى ياخوي اهدى ..

وحاول فيه لين خلاه يجلس..وعطاه كوب مويه يشرب..

شرب الكوب كله وقال وهو ينزله


ابو سليمان:حاس اني بحلم مو مصدق ..ناصر بيطلع..وتهجد صوته..وغطى وجهه بالشماغ..
ماقدر يتحمل الموقف وبكى ابوفيصل مع اخوه...

***************************

الساعه العاشره والنصف صباحا..

منسدح على السرير ورافع راسه بالمخده ويطالع بالسقف...

استغربت وجوده بهالوقت..معقوله اخذ اجازه..وش فيه جالس كذا؟؟
لا يكون تعبان...


تقدمت منه وهي رافعه طرف جلابيتها بيدها..
ليلى:ماداومت اليوم..


غمّض عيونه..مايبي يشوف وجهها الكريه..
زياد:اداوم مااادوام انتي مالك شغل وضفي وجهك..


تفحصته بعيونها..وقالت بخوف
ليلى:انت تعبان..محتاج شيء


فتح عيونه وسحب المخده من تحت راسه وحذفها بالارض معصب
زياد:وبعديييييييين وبعدين وبعدين..كم مره قلتلك لا تفتحين فمك صوووتك يرفع الضغط..ضفي وجهك عني..


راحت عنه ودخلت غرفة الملابس..صارت متعوده على اسلوبه...

طلّعتلها تنوره بيضاء بورود رماديه وموف..طويله من اسبر وبلوزه بيضاء فراشه قطنيه وداخلها بدي رمادي..
لازم تطلع دامه موجود...اخذت شور سريع وتوضت..لبست لبسها وراحت للتسريحه تتزين..اكتفت بواقي الشمس كأساس..ووزعت البلاشر الوردي على خدودها وروج وردي رايق...حطت كحل داخلي ازرق..لبست عقد موف وحلق موف واساور بيضاء وموف ورماديه...لبست صندل كعب متوسط ابيض واخذت شنطتها ديور بيضاء..وسحبت عبايتها وطلعت..دخلت غرفة المكتب وفرشت سجادتها وصلت الضحى قبل لاتطلع..وطلعت جوالها وكتبتله((انا بروح لاهلي..اسفه للازعاج))
وتنهدت..
ليلى:مابيني وبينه الا جدار..وارسلّه مسجات..
طلعت من البيت وقالت للشغاله تبلّغ ام فراس...




ارتاح اول ماطلعت..وجودها يضايقه..مو قادر يسيطر على مشاعره...يحبها ويعشقها بس اذا كانت بعيده...
غصب عليه يتعامل معها بهالاسلوب..يحس نفسه مو هو اللي يتكلم...تنهد..وهو يقرى المسج..
اسفه للازعاج
اسفه للازعاج
اااه ياليلى لو تدرين بس باللي بقلبي..اهتزت اصابعه وكانت بتخونه وترسل مسج لها..قدر يسيطر على نفسه..
وش بتكتب يازياد؟؟...احبك واموت فيك...واذا جيتي ودّي اذبحك..شهالتناقض؟؟؟شلون بتصدقك؟؟؟..
رمى الجوال بعيد عنّه..


قام من سريره ودار بالغرفه..شالسواة مع ابوي؟؟؟
نوال..انا مابيها..مستحيل اخذها..لازم هي تتكلم..لازم هي تحل الموضوع..
طلع بسرعه من غرفته وراح لغرفتها..طق الباب..ولا ردت..
زياد:هذي شفيها..كل هذا نوم..طق الباب مره ثانيه..ولافتحت..عصّب ورجع لغرفته...







**************************








طلع من الفندق مستعجل..المستشفى طالبينه ضروري..
كان ودّه يمر ناصر قبل لايرجع للرياض..بس مافي وقت..
كلّم المطار..وقالوله ان مافي رحله قبل اربع ساعات..
فيصل:اروح بالسياره احسن..مافيه وقت ومو من بعد الرياض..ثلاث اربع ساعات وانا فيها بأذن الله...
وقف عند محطه..وعبى بنزين..واشترى بيره بالتفاح وفطيرة جبن لوزين وعلبتين موية صحه وجالكسي..
وانطلق للرياض...









*********************









الساعه الثانيه ظهرا..

انتشر الخبر بين افراد العايله ..وطارو من الفرح..وقررو يتغدون عند ابوفيصل..
وبعده يسافرون جميع للشرقيه..ومحمد يبقى علشان الشركه ...
موعد رحلتهم الساعه اربع العصر..


جالسين بغرفة الجده..والكل متغطي عدا سلمى..

رفع عيونه لابوه وجواله بيده..

خالد:مقفل جواله..اكيد انه عند ناصر..
ابوفيصل:عند ناصر من الضحى لهالوقت..مو معقوله
محمد:يمكن نايم..او مقفل جواله بدون مايدري..
سليمان:دقو على الفندق طيب..
خالد:ماله داعي اذا وصلنا ندق عليه
ابوسليمان:حنا نبيه يستقبلنا ويعلمنا بالعلوم
خالد:طيب شسوي مارد علي..
محمد:انتم روحو وانا بدق على الفندق
خالد:انت عارف هو بأي فندق
محمد:ايه...الحين انتم روحو لاتفوتكم الطياره..


قامو كلهم وسلمو وطلعو وسط دعاء الجده وابتهالها لله ان يرجعهم سالمين...



شالت الغطاء عن وجهها وهي تقول

ليلى:وانا برجع لبيتي...واجيكم بكره ان شاء الله

الجده:اجلسي يابنيتي هذا حنا مستانسين ومبسوطين وين تبين

ليلى:جدتي انا عندكم من الصبح..تأخرت

عبير:ليلى مافيها شيء اجلسي..بتخلينا بيوم مثل هذا

ليلى:والله مااقدر..بحاول اجيكم الليله..وان ماقدرت بكره ان شاء الله...

الجده:هذا اللي تاخذ غريب..ومسكت سبحتها السوداء وبدت تسبح بصوت عالي وكأنها تقول لاحد يكلمني..


ابتسمت ام فيصل وهي تغمز لبنتها

ام فيصل:روحي يمه تراك ابطيتي على رجلك..
ليلى:يلا مع السلامه...
الكل الله يسلمك...


تمددت عبير وسلمى على الكنب المتصل كانو ورى بعض مايفصلهم الا مركى..
وميساء وام فيصل جلسو يسولفون..والجده لهت بالتسبيح...








********************************









بعد صلاة العصـــر..



نزلت ببجامتها الورديه النص كم وعليها صورة مكي ..
واول ماجلست رفعت السماعة وطلبت يجيبونلها كابتشينو..
كانت تستمع لحديثهم وهي بحالة ملل فظيعه..مافي شيء ضابط معها..
لا اهل..لا حبيب..لا زوج..لا سعاده..
كل شيء بحياتها لا..ورفعت عيونها لشموخ
شموخ:نوال انتي تعبانه...

نوال:لأ...واستقبلت كوب الكابتشينو وبدت ترشف منه ..


شموخ:ماما ماما شوفي
انتبهو للتلفزيون وطالعو بالبرنامج..

ام فراس:هذي البرامج اللي كتبو عنها والاتصالات قطعت ارقامها فيهم؟؟؟
شموخ:ايوه..طالعي ماما يسوي نفسه شيخ وهو مشعوذ..
ليلى:وشوفي الاتصالات كيف عليه..والله الناس متخلفين
ام فراس:غريبه..شلون ساحر وهو بالقران يتكلم
شموخ:القران واجهه لاغراضه الدنيئه..
ليلى: يبتدع شيء مو بالدين..وكل بدعه ضلاله..وبكذا يسحر الناس..

ام فراس:بس هذا بالقراان

شموخ:ايوه بالقران صح ..بس يخترع اشياء من عنده..يعني مثلا يقول اقرو سورة الكرسي خمسين مره قبل لاتنامي وتشوفي زوجك المستقبلي او اقري سورة البقره اربعين ليله وتحملين او تتوظفين او تتزوجين..هي صحيح بالقران بس الرسول ماجابها ولاقال عنها..
والشيطان وش مهمته نشر البدع والخرافات..فلما الناس تصدق هالاشياء وتسويها يكون انجز شيء عظيم وبالتالي يساعد الساحر بالسحر..او يخلط القران بالفاظ اخرى واستغاثات شيطانيه والناس ماتنتبه لها
ليلى:الساحر لازم يسوي شيء يغضب الله علشان الشيطان يساعده..والشيء في هذي الحاله هو البدعه..فهمتي خالتي

ام فراس:اعوذ بالله الله يكفينا شرهم..وليش يحطون مثل هالقنوات

ليلى:علشان الناس التافهين والجبناء...

شموخ:بعضهم مساكين مايدرون

ليلى:بس هالاشياء يكش منها جسمك بالفطره..مشكلة الناس انها تسوي نفسها جاهله..ولا كل شيء باين وواضح..

شموخ:الحين هذا ليه مايمسكونه هذا يجاهر بالسحر

ليلى:بلندن من بيمسكه..

شموخ:السحر مره انتشر..وصار اسهل من شربة الماء..تدرين وحده من صحباتي تقول ان اختها صارلها عشر سنين متزوجه ولا حملت والدكاتره يقولون مافيها شيء..وراحت لشيخ طلع فيها سحر..

ام فراس:من سحرها؟؟؟

شموخ:تقول وحده من صديقاتها

ليلى:وكيف عرفت؟؟؟

شموخ:الجني بسم الله علينا نطق
ليلى:والهبلا صدقت..
شموخ:ايه
ليلى:مو شرط يكون كلام الجني صدق..احيانا يبي يسوي مشاكل بين الاقارب قبل لايطلع..اساسا المشايخ المعترف فيهم ماعمرهم قالو من اللي سحر لانهم يدرون ان الجن يكذب...

ام فراس:الله يستر..حتى الشغالات ينخاف منهم..يقولون انهم يدرسونه دراسه ببلادهم

ليلى:وخلهم يدرسونه ماتقدر تسوي شيء وانا متحصنه..

ام فراس:بس الواحد يلهى وينسى

ليلى:اذا خايف على نفسه مارح يلهى وبعدين يكفيه قراية المعوذات ثلاث مرات..اذا مايبي يقرى باقي الاذكار..

شموخ:تاكلين سبع تمرات بالصبح واتحدى ساحر يقدر يسحرك..هذا يدل انهم اضعف من الضعف..بأكلة تمر مايقدرون يسوونلك شيء..

ليلى:الاذكار سهله ..اقريها وانتي تمشين وانتي تتمكيجين قبل الجامعه وانتي راكبه السياره ..ماتاخذ وقت بس على حسب التعود..
انا عن نفسي اقراها بعد صلاة الفجر وبعد المغرب..طبعا اقرى الاذكار الثانيه واحرص اني اقرى الكرسي بعد كل صلاة...
والله ماتاخذ مني ثواني..وبتحميني بعد الله سبحانه وتعالى من كل شر..

ام فراس:انا مره حضرت حلقه للفتاوى..اتصلت وحده وقالت للشيخ اني اعتمرت وماقدرت اشوف الكعبه..

شموخ:الكعبه بكبرها ماقدرت تشوفها؟؟؟

ليلى:انعمت يعني

ام فراس:لأ..تقول كل شيء اشوفه الا الكعبه...وسألها الشيخ قال انتي مسويه ذنب عظيم وشو؟؟؟
طبعا اول شي قالت ماسويت شيء وبعدين قالت سرقت..
شموخ:ايه وش قال
ام فراس:قال لأ..وقالت اكثر من ذنب..وكلها قال الشيخ لأ سويتي اعظم..لين قالت اني زنيت
شموخ:هيييء
ليلى:ايوه
ام فراس:قال لأ..سويتي اعظم..قالت سحرت وحده ودفنت سحرها بقبر واحد..قال الشيخ هذا هو اللي سويتيه..وهذا عقاب من الله..
ليلى:مشكلة الحريم تهاونهم..مايدرون ان اللي يجي ساحر بدون مايصدقه يعني بس حب استطلاع مثل اللي يقرون المستقبل وتقول مو مصدقتهم بس للمتعه..ماتقبل صلاتها اربعين..واللي تصدق هذي كافره تخرج من دائرة محمد...









ضرب ايده بطاولة المكتب...ليش مايرد..ليش مقفل جواله هذا وقته يافيصل....لازم يلقالي حل....وليلى شفيها تأخرت..يااارب ارحمني من هالحال..

طلع من الغرفه وهو متضايق...ونزل تحت..



دخل عليهم بجنز ازرق وتيشرت سماوي وطالع بنوال لثواني وهو محتقرها..
كانت ترشف من الكابتشينو وقلبها يرجف...

جلس متعمد بجنبها..وهمس
زياد:بعد شوي ابيك بموضوع..والتفت عليهم...متى جيتي انتي..؟؟؟

بلعت ريقها بصعوبه..مو ناقصه فضايح عند اهله

ليلى:قبل صلاة العصر...
زياد:كان جلستي بعد..
شبّكت يدينها ببعض متوتره..بدى اسلوبه الحلو..
ليلى:تأخرت..علشان اهلي مسوين غدى ومجتمعين..لان ناصر ولد عمي بيطلع تنازلو عنّه..


رفع حاجب..وقال وهو قرفان

زياد:ولد عمّي...انا ماطلبت قصة حياتك..ولا ماتقدرين لازم تهذرين وتصجين راسي..افف انا شيجلسني بمكان انتي فيه....
وطلع برى البيت..

ماقدرت ترفع عيونها عن الارض...حمّر وجهها من الفشيله..حست ان صوتها راح..

شكلها بايخ ..وتحس الكل يضحك او شفقان عليها..انسحبت بسرعه وطلعت لجناحها..




التفتت شموخ على امها
شموخ:يمه عاجبك تصرفاته
ام فراس:بكيفه حنا مالنا دخل...نوال شفيك من جيتي وانتي ساكته
شموخ:هههههه ضيفة شرف
نوال:عن اذنكم..ونزلت الكوب على الطاوله وطلعت بسرعه ...









***********************

الساعه التاسعه مســاءًا





الجيران كلهم مجتمعين عندهم يباركون للجده..
كانت لابسه تنوره غجريه سوداء وبلوزه شيفون فراشه سوداء ومن تحت الصدر مشغول بتطريز خفيف وينربط من ورى ..وتاركه شعرها مفتوح..وروج فوشي وبلاشر فوشي وكحل اسود..كانت تحاول تكون طبيعيه ونضره..


اخذت قطعة الحلا مغصوبه..تحس بطنها امتلى وتخاف ترجّع بأي لحظه..
بلعتها بصعوبه..والتفتت على خالتها..

عبير:مافيني شيء صدقيني
همست علشان محد يسمعها
ام مؤيد:حالك ابدا مو عاجبني..وتراني صبرت عليك اذا مو هامتك صحتك انا يهمني..
عبير:خالتي بشويش الناس بدت تسمع..
ام مؤيد:الليله تروحين معي للبيت..بكلم جدتك
عبير:لا مااقدر ..ابوي مايرضى
ام مؤيد:مو قايل شيء..والتهت مع سواليف الحريم...
مدت ايدها واخذت الفنجان من ايد ميساء..
ام طلال:بشرينا ياميساء ماحملتي..

ابتسمت بحب
ميساء:ادعيلي ياخاله..

ام طلال:الله يرزقك بالذريه الصالحه...
الجده:ان شاء الله ربي ير*** قريب..شصار على عرس طلال
ام طلال:والله مادري ياام راشد..راح لناصر اليوم وماعلمني وش اتفق مع مرته..
ام فيصل:الله يوفقه وييسرله يارب وير*** بالذريه الصالحه..
سلمى:خالتي قوليله يعلمنا متى بالضبط موعد العرس نبي نفصل ونتجهز..
ام طلال:عاد انتي ياسلمى اللي تقومين معي بالعرس..
سلمى:ابشري طلال مثل اخوي...



اجتاحها الاعصار وبدت تفقد التركيز..بلعت ريقها بصعوبه..ووقفت وهي تبتسم وطلعت بسرعه من غرفة جدتها..


وين تروح...تحت صعب..الكل ممكن يشوفها..خصوصا الخدامات اللي بكل مكان..
تحاملت على نفسها وحاولت تسرع من خطواتها..لازم اطلع فووق ..مابي احد يشوفني..موو وقته خلهم فرحانين بناصر...
يااربي متى اوصل للدرج متى.....












ركن سيارته بالمواقف..ونزل وهو حامل شنطته بيد وباليد الثانيه البالطو..
كان مرهق وتعباااان..اربع ساعات وهو بالعمليات..الحاله طارئه والدكتور اللي مفروض يسوي العمليه جاه ظرف طارئ ومافيه غيره...
فتح الباب بشويش..راسه مصدع ومحتاج للراحه وماله خلق يشوف احد...











في غرفة ليلى
بصعوبه وقفت على كرسي التسريحه..واخيرا تحققت امنيتها..فتحت الدروج وطلعت كل شيء فيها..
كل شيء تتمناه وتتمنى تملكه..ومدت ايدها واخذت الروج وبدت تخط فيه شفايفها الرقيقه....










في اخر درجه توصلها للدور الثاني..اجتاحها الدوار..تمسكت بالدرابزين..وهي تدعي ربها يلطف بحالها..

ماقدرت تسيطر على نفسها الدنيا حولها ظلام..
حمدت ربها انها بالدور الثاني على الاقل محد يشوفها..

دمعت عيونها غصب عنها...وجثت على ركبها اللي لامست الرخام السكري البارد والقاسي..

حاولت تتنفس..حالتها بدت تسوء..ركت راسها على الدرابزاين عل وعسى ..وثواني مسكت بطنها واحنت راسها للامام وبدت ترجع كل شيء اكلته...


خلاص ماعندها قدره ترفع راسها اكثر..ارخت راسها على الدرجه ...وغمضت عيونها..


يااارب ابي بس اشوف ناصر..يارب طول عمري لين اشوف نااصر...




عبيــــــر!!!!